ديوان الشاعر .... عبدالرحمن الأبنودي
--------------------------------------------------------------------------------
أحزاني العاديه
وفجأة
هبطت على الميدان
من كل جهات المدن الخرسا
الوف شبان
زاحفين يسألوا عن موت الفجر
استنوا الفجر ورا الفجر
ان القتل يكف
ان القبضه تخف
ولذلك خرجوا يطالبوا
بالقبض على القبضه
وتقديم الكف
الدم
قلب الميدان وعدل
وكأنه دن نحاس مصهور
انا عندى فكرة عن المدن
اللى يكرهها النور
والقبر اللى يبات مش مسرور
وعندى فكرة عن العار
وميلاد النار
والسجن فى قلبى مش على رسمه سور
قلت له لأ يا بيه
انا اسف
بلدى بربيع وصباح
ولسه فى صوتى هديل الينابيع
لسه فى قلبى صهيل المصباح
لسه العالم حيى رايح جى
بيفرق بين الدكنه وبين الضى
بلدى مهما تتضيع مش حتضيع
ما ضايع الا ميدان وسيع
يساع خيول الجميع
يقدم المقدام
ويفرسن الفارس
ويترك الشجاعه للشجيع
ولا باعرف ابكى صحابى غير فى الليل
انا اللى واخد على القمر
ومكلمه اطنان من الشهور
وعلى النظر من خلف كوة فى سور
واللى قتلنى ما ظهر له دليل
وفى ليله التشييع
كان القمر غافل ..مجاش
والنجم كان حافل
لا بطل الرقصه ولا الارتعاش
لما بلغنى الخبر
اتزحم الباب
وجونى الاحباب
ده يغسل ..ده يكفن ..ده يعجن كف تراب
وانا كنت موصى لا تحملنى الا كتوف اخوان
اكلوا على خوان
وما بينهمش خيانه ولا خوان
والا نعشى ما حينفدش من الباب
ما اجمل نومه على كتوف اصحابك
تنظر صادقك من كدابك
تبحث عن صاحب انبل وش
فى الزمن الغش
والرؤيه قصادى اتسعت
بصيت واحسب نفسى بين خلان
تعالوا شوفوا الدنيا من مكانى
حاشتنا اغراض الحياه عن النظر
بالرغم من نبل الالم والانتظار
اتعلمنا حاجات اقلها الحذر
ونمنا سنوات مدهشه
نحلب ليالى حلمنا المنتظر
وامتلات الاسواق بالمواكب
تبيع صديد الوهم والمراكب
وفارشه بالوطن على الرصيف
بالفكر والجياع والكواكب ومذله الرغيف
شويه فات سقراط
مسلسلينه من القدم للباط
ومتهم باليأس والاحباط
وبالعدم وبالزنا وباللواط
وبكل كافه التهم
وهو عابر للجحيم على الصراط
ينظر على الشعب التعيس ويبتسم
الى الجحيم للفلسفه
دنيا لا كانت يوم
ولا حتكون فى يوم كويسه
دنيا فى هيأة خنفسة
دنيا فسه
ما اتعس الانسان
ما اسعد الحيوان
وعبر
وصف من الزوانى وراه
متلطخين بالبودرة والمعاجين
حاصرين غطاوى الروس
بطونهم عريانين
بيغنوا طوبى لضحكه المساجين
وعيال عرايا
تفيض بها الطرقات
من القرى ومن المقاطعات
اطفال فى لون الجوع
صوت النفس مسموع
اطفال شبه وضلوع
اما انا
فاتسعت الرؤيا
وبصيت للمسا وللحياه المتعسه
وللنسايم المنعسه
وقلت ورا سقراط
دنيا فى هيئه خنفسه
ما اتعس الانسان
ما اسعد الحيوان
قبل مرورى على بعض مكان
كنت موصى يمه افوت
هجمت من الحارة مجموعه نسوان
رجعوا بالصوت
قالوا يا عبد الرحمن
وقدرت تموت
وتفوت اللحم العارى المتهان
فى المدن اللى معداش منها ريحه انسان
انا مت
ومش منظور لى جواب
متحصن بكتوف الاصحاب
ولذلك فت
عند التربه
قعد الشيخ اوصانى
وادانى كتابى بيمانى
قال لى لو جولك ملكان
قول انا عبد الله مش عبد الرحمن
ودعا لى فى لحظه ما يقوم للعدل ميزان
ينوبنى شىء من العفو وبعض الغفران
وفى لحظه ما انا متزحلق
فى قماشى الابيض
من جوف القبر
التقدم ضابط واتعرض
قبض على الجثه
وطلب الاوراق
مزع الاكفان
عدل الوش
ووقف وركلنى
وقالى بلؤم شديد
حتى فى الموت بتغش
شيلوه
ولقيت نفسى والعربيه داخله القلعه
كانت الدنيا ضجيج والشمس نيران والعه
قوم يا انسان
انا قلت
انا عبد الله مش عبد الرحمن
زى ما الشيخ اوصانى
قالى عندى اوراق تثبت انك مش مرتاح
امرك فاح
ولقيت نفسى محاصر تانى وتحت الرجلين
قلت لنفسى وبعدين
راح تفضل كده لامتى يا غلبان ؟
بتدارى ايه ؟
ايه باقى تانى علشان تبقى عليه ؟
وطنك ؟
متباع
سرك ؟
متذاع
الدنيا حويطه وانت بتاع
ويهين المعنى الضابط
ويدوس بالجزمه على الحلم
ربنا رازجه بجهل غانيه عن كل العلم
ماذا تعنى بالكون يا يساعك يا يسعنى ؟؟
رد يا جربان يا ابن الوسخة ياكلب
اظنك حتقولى تانى الشعب
وصفعنى وتنى على بطنى بالكعب
يا سعادة البيه وانا ايه؟ او ليا فى العمال ايه ؟
ما تضيع الدنيا والعمال دى تغور
يا صاحب هذا المبنى الموروث
ضل جدودك فى الجدران مغروس
انت السلطان وانا المملوك
انت السجان وانا المهلوك
انت المنصور وانا المسفوك
انا الصعلوك وامتى الصعلوك
يقدر يتجاسر على السلطان
اللى فى ايده بدل البرهان مليون برهان
رفع الهد
ماهو برضه دول يفهموا فى الكدب
اول ما اتلفت جه غارس الجزمه فى قورتى
وجيت اقعد بركنى على الاسفلت
ولقيت نفسى محاصر تانى وتحت الرجلين
قلت لنفسى وبعدين
راح تفضل كده لامتى يا غلبان ؟
ما لقتش الراحه فى الموت
يمكن تلاقيها ورا القضبان
اطلعت على الشبابيك وعلى القضبان
على الموقف
على السجن وعلى السجان
ولقيتنى طول عمرى كنت كده
كلب ..محاصر ..متهان ..منبوذ ..جربان
وانا يا ابنى الحلم اللى ما لهش اوان
معروف عشى فى قلب البستان
معروف صوتى فى زمن الاحزان
وفى اى زمان
واتذكرت سنه ما اتبنت القلعه
وكنت انا اول مسجون
وكان الضابط ده اول سجان
يوم ما ركلنى نفس الركله
يوم ما صفعنى نفس الصفعه
نفس طريقه الركل
وآخر الليل جانى بدم صحابى فى الاكل
استأذنت ارتب اقوالى
قفل الباب
واتفتح الباب
وخلاص
يا عم الضابط انت كداب
واللى باعتك كداب
مش بالذل حاشوفكم غير
ولا استرجى منكم خير
انتم كلاب الحاكم
واحنا الطير
انتم التوجيه واحنا السيل
انتم لصوص القوت
واحنا بنبنى بيوت
احنا الصوت ساعه ما تحبوا الدنيا سكوت
احنا شعبين ..شعبين ..شعبين
شوف الاول فين ؟؟
والتانى فين ؟؟
وآدى الخط ما بين الاتنين بيفوت
انتم بعتم الارض بفاسها ..بناسها
فى ميدان الدنيا فكيتوا لباسها
بانت وش وضهر
بطن وصدر
والريحه سبقت طلعه انفاسها
واحنا ولاد الكلب الشعب
احنا بتوع الاجمل وطريقه الصعب
والضرب ببوز الجزمه وبسن الكعب
والموت فى الحرب
لكن انتم خلقكم سيد الملك
جاهزين للملك
ايديكم نعمت من طول ما بتفتل ليالينا الحلك
احنا الهلك وانت الترك
سواها بحكمته صاحب الملك
انا المطحون المسجون
اللى تاريخى مركون
وانت قلاوون وابن طولون ونابليون
الزنزانه دى مبنيه قبل الكون
قبل الظلم ما يكسب جولات اللون
يا عم الضابط
احبسنى
سففنى الحنضل واتعسنى
رأينا خلف خلاف
احبسنى او اطلقنى وادهسنى
رأينا خلف خلاف
واذا كنت لوحدى دلوقت
بكره مع الوقت
حتزور الزنزانه دى اجيال
واكيد فيه جيل
اوصافه غير نفس الاوصاف
ان شاف يوعى
وان وعى ما يخاف
انتم الخونه لو يصدق ظنى
خد مفاتيح سجنك واترك لى وطنى
وطنى غير وطنك
ومشى
قلت لنفسى
ما خدمك الا من سجنك
المتهم
عشب الربيع مهما اندهس
بالقدم
أو انتنى في الريح
بيشب تاني لفوق
يغني للخضره وطعم الألم
حبيبتي وإن يسألوكي
قولى مسافر بعيد
رايح يقابل العيد
على قلعة فوق الجبل
واللا في سجن جديد
في غرفة ضيقة في ساحة
الإعدام
يرمى الرصاص واللا
الخلاص
في خية المشنقة
مشوار بعيد المعنى
عالي الصوت
إذا مارحتوش أموت
وعالمي ينقفل
والشمس تسحب خيوطها وتنسحب في خجل
وسعيد كل ما قربت المواعيد
وهل فجر جديد
سعيد بكل اللى متألمه
كل الألم في الدنيا متعلمه
في زماننا ده ما أخيب اللى
الحزن يفطمه
تعبت أقرا الوجوه بحثا عن
الإنسان
وتعبت أقرا اليفط بحثا عن
العنوان
كل الخرايط ما توضح تبهت
الأوطان
لكن خلاص كتبت اسمي
بومض الرصاص
وفديت عيون الوطن وفديت
عيون الناس
ويا أمي إن يسألوكي لا
يترعش لك حضن
ولا تحسى بحزن وتقولي مات
في السجن
ساعتها يبقى الحزن بلا
موضوع
والسجن بلا موضوع والموت
بلا أكفان
وكفاية جربنا سنين الموت
بالمجان
والتافه المتهان أهانا
بالمجموع
الموت مجرد سفر
لاشواك ولا زعابين ولا عفر
ولا كلاب بتطل من جورنان
تخطب بألف لسان
تصبغ وجوهنا النيره بأصبغ
الألوان
ويا أمي كل ما يوهموا بموتي
اتذكري صوتي بذمتك مش
كان عظيم الآن
قالت له صوتك نشان
قالت موتك بيان
طالع يقول موجود يا أسمر يا أبو عيون سود
فكيت طلاسم سحرنا
المرصود
وعدلت وش الزمان
سيد طه
زي المسمار القلاووظ
قصير .. وتحس أنه قصيٌر أكتر
لما يقوم
أسمر..وكأنه قديم
الدم صعيدي ما زال
الوش الحامي والقول
صادق ..م القلب
وعمره ما كان كذاب
أو معمول
إذا حط ايديه في مشروع
لا بد يبوظ
صراحته بتفسد أيها موضوع
لكن الصدق
ما بيتبعش بمال
ما دام الدم صعيدي ما زال
ولا بيعرفش الا الصدق
حتي لو هو وولاده
يموتوا من الجوع
حاحكي لك قصة صاصا يا أستاذ
كان صاصا ده قول فرعة وزارعها شيطان
كان أكره شئ عنده هم البريطان
وسياسي صح
بقعد حنب الراديو في ميعاد النشرة
ومعين واحد عنده لقراية الجرنان
مش يعني معينه بمرتب
ليه.. ما تقوله .. معينة بالضرب
لكن كانو بيحبوه والا لاء ؟... ويحموه ولا لاء
بس يا استاذ
كان فيه خبصية والا مفيش
الإنجليز في البر التاني أخدو علم
وصادوهم بفكارزاتهم.. والرشاشين
خراطيش خراطيش
واللهي الميه بين الشطين يومها غلت من سهج النار
قلنا ضاعوا الولدات
وام علي اب سلمي تصرخ وتقول يا ولادي
طلع الشط يوميها بناسه وعياله
من جبلاية السيد هاشم والفار واب عارف
واللي جه من الشلوفة والكمامنتو
صوت الضرب الجامد صحي الناس من النوم
قول وطلعنا النسوان تصرخ
والرجالة بتدعي والعيايل بتقول
يخرب بيتك يا خواجة
يخرب بيتك يا خواجة
مات حد يا سيد طه
ولا حد
واحد بس اتعور كان اسمه غريب
الناس قالت سيدك الغريب ..نجٌاهم فيه
جابهم همٌ سلامه وخد الطلقة في دراعه
طلعوا يا أستاذ من المية
وكنالنا دي في الشتا أسقع م الثلج
ولعنا الفرن
ودفيناهم
حبٌة طلعوا فوق
والباقي كان لافف من حوالين الفرن ف وش النار
وفاكرهم
وكأن ده لسة بيحصل دلوقت تمام
كان بيتنا ورا بيت عم " اب سلمى
وكانت أمي لسة عايشة
برضة بالنسبة لدلوقتي يا " على اب سلمى"
كنا عيال
إي......ه"
وآديكي برضه رجعتي من تاني للشقا ... يا كنال
للنار ... وخراب البيت والهجرة
برضه رجع لك تاني الكاكي
ده أنت غريبة بشكل .... غريبة يا كنال
بتحبينا احنا أكتر
والا بتحبي العسك أكتر؟
والا بتشتاقيلنا احنا لاتنين ؟
بتضايفي دول نوبة
وتضايفي دول نوبة
إحنا في أيام الزرع
وهمٌ في أيام الحرب
عمري ياخي ما شفت "كنان"
بيحب الدان ذي ما بيحب الرمان
الا انتي يا "كنان"
" إحكي لنا يا حاج اب سلمى حكاية كوبري بور توفيق .."
" ليه .. هو لسة فاضل حد ما يعرفهاش؟ "
الموت علي الأسفلت
من الزوايا والأركان
خرج الطوفان:
ألوفات شبان.
إصعد يادخان
إبعد ياشيطان
إجبن ياجبان
رجع الاسم ورجع العنوان.
يغلى البركان
ويفور
ويدور
إتهد السور .. طلع الإنسان.
الصدر العالى عليه الوشم:
خريطة الدم .. فلسطين ياأحلا الأوطان.
مين قال بعنا ..؟
مين قال ضعنا؟
يا تمانية واربعين كدابه وكدابه ياسبعه وتسعين.
التار له نار طى الكتمان
واليوم يا خليل
يا جليل
يا بيت لحم ..الإعلان
يا..صوت الطفل اللى بيحررنى ف بلدى
بارك ربى فيك.....ياولدى
يا..نهر النار الفايره اوعى تبطل جريان
دراعات الوحش الغاضب..أصوات الكروان
راجح
فالح
مازن
مروان
وأخدنا بتارك يا غسان
يا كمال ناصر
دمك حاصر
أعداءك..مش بس فى لبنان
يا ... ماجد يابو شرار جينا
دمك فينا
لسة سامعينك تنيادينا
ما عادتش الدمعة مكتومه
صبحت صرخة
صبحت صرخةروح محمومه
تصفع روما
ع الكتف نشيلوا سرير الفندق ونشيلك
مواويل الثوره مواويلك
تحت قميصك غنوة شهدا
من كل مخيم...
زاحفه يا ماجد تحت الثوره تغنى لك
عطر الآنبياف مناديلك
أولادك يابو شرار بالطوب
عدلوا المقلوب
شطبوا كل القدر المكتوب
فتحوا بوابة الفجر
وواجهوا الغدر
وصاحوا:يا فلسطين
يسقط كل الكدب العربى
يسقط كل الاخوه الخاينين
نرسم بالدم خريطه للآوطان
إتفلت الجان
والمسجون قام ياكْْْْْْْْْْْْْْْْْْْْْْْْْْْْْْْْْْْْْْْْْْْْْْْ ْْْْْْْْْْْْْْْْْْْْْْْْْْْْْْْل السجان
دارت دارت
لعبتهم بارت..
قوتهم خارت.. وانهارت
والدايره على الباغى دارت
دارت .. دارت
يادنان الكبت ..الظلم .. القهر .. على الطرقات .. فارت.
ومخيم بات .. وصبح ميدان
صبح ميدان والدنيا
الدنيا اتحطت واتشالت
يامنه
والله وشبت يا عبد الرُّحمان ..
عجّزت يا واد ؟
مُسْرَعْ؟
ميتى وكيف؟
عاد اللي يعجّز في بلاده
غير اللي يعجز ضيف !!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمان!!
أمال انا على كده مت بقى لي ميت حول!!
والله خايفة يا وليدي القعدة لتطول
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين حاحيا كمان وكمان
عشت كتير
عشت لحد ماشفتك عجّزت يا عبد الرحمان
وقالولي قال خَلَّفت
وانت عجوز خلَّفت يا اخوي؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض
ماشي يا عبد الرحمان
أهو عشنا وطلنا منك بصة وشمة
دلوك بس ما فكرت ف يامنة وقلت: يا عمة؟
حبيبي انت يا عبد الرحمان
والله حبيبي .. وتتحب
على قد ماسارقاك الغربة
لكن ليك قلب
مش زي ولاد الكلب
اللي نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور !!
ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان
آ..با..ي ما مجلّع قوي يا عبد الرحمان..
طب ده انا ليّا ستّ سنين
مزروعة في ظهر الباب
لم طلّوا علينا أحبة ولا أغراب..
خليهم..
ينفعوا
أعملهم أكفان..!!
كرمش وشي
فاكر يامنة وفاكر الوش؟
إوعى تصدقها الدنيا..
غش ف غش..!!
إذا جاك الموت يا وليدي
موت على طول..
اللي اتخطفوا فضلوا أحباب
صاحيين في القلب
كإن ماحدش غاب..
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب
أول مايجيك الموت .. افتح..
أو ماينادي عليك .. إجلح..
إنت الكسبان..
إوعى تحسبها حساب..!!
بلا واد .. بلا بت..
ده زمن يوم مايصدق .. كداب..!!
سيبها لهم بالحال والمال وانفد
إوعى تبص وراك..
الورث تراب
وحيطان الأيام طين
وعيالك بيك مش بيك عايشين..!!
يو.....ه يا رمان..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.
مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!
بناتي رضية ونجية ماتوا وراحوا
وأنا اللي قعدت..
طيِّب يا زمان..!!
إ
إوعى تعيش يوم واحد بعد عيالك
إوعى يا عبد الرحمان..
في الدنيا أوجاع وهموم أشكال والوان..
الناس مابتعرفهاش..
أوعرهم لو حتعيش
بعد عيالك ماتموت..
ساعتها بس ..
حاتعرف إيه هوّه الموت..!!
أول مايجي لك .. نط
لسه بتحكي لهم بحرى حكاية
فاطنة وحراجي القط..؟
آ.. باي ماكنت شقي وعفريت
من دون كل الولدات..
كنت مخالف..
برّاوي..
وكنت مخبي في عينيك السحراوي
تمللي حاجات..
زي الحداية ..
تخوي ع الحاجة .. وتطير ..
من صغرك بضوافر واعرة .. ومناقير..
بس ماكنتش كداب..
وآديني استنيت في الدنيا
لما شعرك شاب..!!
قِدِم البيت..
اتهدت قبله بيوت وبيوت..
وأصيل هوه..
مستنيني لما أموت..!!
حاتيجي العيد الجاي؟
واذا جيت
حاتجيني لجاي؟
وحتشرب مع يامنة الشاي ..؟
حاجي ياعمة وجيت..
لالقيت يامنة ولا البيت
يا أمه قومي
يا أمة قومي بقـي.. ده انتـي فضحتينـا...
الأمريكان سكنـوا مـش وسطينـا.. لأفينـا
والاّ اليهـود اللـي سرقـوا حتـي أغانينـا
حرتوا الأراضي وقتلـوا هنـاك أعـز الولـد
الشهدا أكوام علـي الأكتـاف.. إوعـي تعـد
أبـدان جميلـة.. بتاكلهـا النسـور والحِـدّ
إحنـا انتهينـا... تعالـوا ياللـي بعديـنـا
يا أمة قومـي بقـي لأحسـن فضحتينـا....
الأمريكان سكنوا مـش وسطينـا.. لأفينـا
ياللي فـي عُسـري وضيـق اليـد نسيتونـا
أهي الفلـوس نفسهـا.. حاتـروح لأعادينـا
بترول أراضي العدو ده اللي في أراضينـا.
شفتـوش كـده؟ والبـلاد ممنـوع نحميهـا
نحميها من مين؟ دي مش أراضينا.. أراضيها
هوه بسلاحه المميت.. جـاي ينـزرع فيهـا
وانتو.. بدخان صمتكـم يـا أهلـي عميتونـا
ياللي فـي عسـري وضيـق اليـد نسيتونـا
أهو جه ياكلكوا اللي علي حربه انتو لُمْتونا
يا أمة ترمـي ضميرهـا للكـلاب.. ببـلاش
يا أمة قبلـت مصيرهـا (خدمـة الأوبـاش)
كله كلام.. لا انتماء.. ولا وطـن.. ولا ديـن
قاعدين سنين تحلموا بظهور (صلاح الديـن)
ماكان ما بينكـم قتلتـوه انتـو يـا فالحيـن
كل اللي صدوا العدو.. راحوا ومش راجعيـن
ولا »صلاح دين« يا ناس ولا حتي زفت الطين
الحي ميت يا ناس أمـا اللـي ميـت عـاش
يا أمـة ترمـي ضميرهـا للكـلاب ببـلاش
يا أمـة قبلـت بفرحـة.. خدمـة الأوبـاش
ما اعادش إلا انتظار الموت.. يا إمـا نقـوم
نسجد في ساحة النضال وعن البلاهة نصـوم
لو الدما تبقي بحـر.. فـي دمنـا.. حنعـوم
إزاي يعيش الوطن.. من غير رجال تحميـه؟
تموت وتحيا معـاه.. تمـوت وتحيـا ليـه..
كإن ابن العرب مولـود يـا نـاس.. مهـزوم
ماعادش إلا انتظار المـوت يـا إمـا نقـوم
نحمي الوطن بالصـدور.. ونفجـر المكتـوم
كل الشوارع بتصـرخ فـي المـدن بجنـون
توقّـف الحـرب.. تفضـح فكـرة المجنـون
في أوروبا حتي ف أميركا.. لأ في كل الكون..
إلا احنـا إرتحـنـا قــدام أي تليفـزيـون
آدي العـراق فـي طريقهـا للغـرق يـابـا
واحنـا حواليـه خُطبنـا فجـة... كـدابـة
نتخانقوا من غير سبب.. لأ فيه سبـب طبعـاً
وحنغرقوا في الزمن.. يـا أمتـي.... جمعـاً
متملعنيـن... إنمـا... عدونـا..... ألـعـن
قدَّامُه حملان.. لكين.. علي بعضنـا ديابـة
الكـل عايـز ساعـات المؤتمـر تمضـي..
علشان ما يجري علي دار العـدو.. يمضـي
كـإن بعضـي ينازعنـي.. علـي بعضـي..
معظمنا هوه العدو.. يعني العـراق يـا هـوه
مش أمريكان وانجليز.. إحنا اللـي حنهـدوه
واحنا اللي بترولـه رايحيـن للعـدو نِهْـدوه
وبعده بترول جديد.. وبعـده بتـرول جديـد
وأنا منتظر مقتلـي وإيـدي علـي خـدي
الكـل عـاوز ساعـات المؤتمـر تمضـي..
علشان ما يجري علي دار العـد (يمضـي)
أنا باهيب بالشباب.. إنسوا اللي قضُّوا العمـر
يتكلموا ويخطبوا وسابوا سنينكو... تمُـر...
ده انتـو القلـوب الفتيـة والوجـوه السمـر
ترضـوا تبيعـوا الوطـن بتفاهـة الغايـات؟
وتبقـوا إنتـو وأعـداء الوطـن إخــوات؟
متربصـة بيـكـو أم العولـمـة والـجـات
تتمِسْحوا م الكون كما مسحوا الهنود الحمـر
أنا باهيب بالشباب انسوا اللي قضّـوا العمـر
يتكلمـوا ويخطبـوا وسابـوا سنينكـو تمـر
يا أمة قومي.. وانتي يا مصـر.. ماتونِّيـش
وإلا عشريـن سنـة.. حاتمـر زي مافيـش
تعـلا اليفـط أعـلا مياديـن أمـة الإسـلام
شركـة إسرائيليـة اهـه لصناعـة الأقـلام
واستديـو صهيـون هنـا لصناعـة الأفـلام
والمصنـع الإسرائيلـي لعلبـة الورنـيـش
يا أمة قومي وإنتـي يـا مصـر ماتونيـش
بغداد.. يـا أم التاريـخ والحكمـة والأشعـار
بغـداد يـا أم القصـور والنخـل والأنـهـار
ماعادش إلا الصمود الليل فـي آخـره نهـار
دافعي بشرف واتركـي للأمـة طعـم العـار
ملـو التاريـخ.. الفصـول صادقـة وكدابـة
سنتيـن تقـدَّم.. وألـف.. نعـودوا للغابـة
الأمـة فيـهـا فــرح لأزمـلـه نـدابـه
الدنيـا كلتهـا تهتـف باسـمِـك المظـلـوم
بكره الجراح تندمل.. عُمـر الظـلام مايـدوم
أطفالـك اللـي التاريـخ حيحكـي قصتـهـم
ونساكـي فـي صبرهـم. الدنيـا نسيتـهـم
يا دي العراق العريق صحّي العـرب م النـوم
يا طاعم المحرومين.. إزاي تبات محـروم.؟
ومهما كانـوا الطغـاة.. الـدار لأهـل الـدار
الـدار لأهـل الـدار ، الـدار لأهـل الـدار
البدل
مرثيه لجمال عبد الناصر
أبادْلكُم حرّية .. بسجن.
أبادلكم سِلْم .. بحرب.
أبادلكم صوتى .. بصمت.
أبادلكم اسمى .. بصوت مجهول.
أبادلكم فدادين الطين
بالعتمة فى رطوبة الزنازين.
أبادلكم حاكم عادل بالفرعون الجبار.
الجنّة .. بالنار.
الراحة .. بتعب القلب.
أبادلكم أمن .. بخوف.
زُهرّية ورْد .. بكباية دم.
وحياة مرتاحة أبادلها بموت.
أبادلكم ضِحكاتى .. بغمّ
ورفيقى أبادله بمخبر كلب.
أبادلكم لو كنتوا تبادلونى
تاخدوا سنواتكم وتردُّولى السنوات.
صعب تردُّولى السنوات .
صعب تبادلونى برجوع العزة
ومعنى الوطنية والأوطان ..
للشعب.
ورجوع دمّ الشهداء.
والوجه الأصلى لكلمة أعداء.
ونضارة وجْه الفقراء.
وكرامة تساوى كرامة كلّ اللى اتسلبوا.
والنصر .. لكل اللى من غير حرب
اتغلبوا
بادْلونى .. وجوه بوجوه
ولغات بلغات.
خدوا كل اللى حيلتنا من ألوفات:
اللى اتنهبوا .. واللى لسه حيتنهبوا
وردوا للأمة رجولتها ونخوتها وقُدرتها.
ردُّوها من تابع مذلول
لزعيمة لاستقلال.
من قُطعان سايحة .. لرجال.
ردولها كل اللى سرقتوه من مال.
ادفعوا عنْها ديون الأطفال.
ردوا لها شمس المستقبل
واكنسوا أطنان العتمة من درب الأجيال.
أخلاق الشعب اللى انداس ..
واللى أصبح ناس مش ناس
ردوا للشعب رغيفُه المخطوف.
صوته الأصلى وعرقه المسفُوف.
وبالمجّانى .. رجعوا للطفل الكراس.
ابنوا على شط النيل المصنع جنب المصنع.
رُدوا للجندى المصرى وظيفة المدفع.
ردُّوا الإنسان العادى ياخُدْ قيمةْ ما يدفع.
والفلاح ردوه من ذُل الغربة
وردوله حُبه للفاس.
رُدوا الوطن المسروق
اللى اتمرغ فى مخالب السوق.
فكوا عنه الطوق.
شِلُّوا القدم الصهيونية الساكنة فى الدقى
وماشية فى باب اللوق.
ردُّوا الجمعية للفلاحين
والمصنع للعمال.
لو تقدروا تخرجوا مِ الأغلال
اللى كتفكم بيها اللى علمكم لعبة رأس المال ..
لو غيرتوا الحال ..
أُقسم قدام شعبى أغنى لكم من قلبى
وعمرى ما غنى تانى
لـ .. (جمال)
مجموعه رسايل الاسطى حراجى لزوجته فاطنه عبد الغفار)
...
الجوهرة المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلايه الفار
أسوان ... الرسالة 1
أما بعد .. لو كنت هاودت كسوفي ع التأخير
سامحيني يا فطنه في طول الغيبه عليكم
وأنا خجلان .. خجلان .. وأقولك يا زوجتنا أنا خجلان منكم ..
من هنا للصبح ..
شهرين دلوقت ..
من يوم ما عنيكي يا فاطنه .. بلت شباك القطر ..
لسوعتي بدمعك ضهر يديَ
لحضتها قلت لك :
(( قبل ما عوصل عتلاقي جوابي جي ... ))
نهنهتي .. وقلتي لي بعتاب:
(( النبي عارفاك كداب .. نساي
وعتنسى أول ما عتنزل في أسوان .. ))
حسيت واليد بتخطفها يد الجدعان
بالقلب ف جوفي ما عارف ان كان بردان .. دفيان
والبت عزيزه والواد عيد
قناديل في الجوف .. زي ما بتضوي .. بيقيد ..
.......... والقطر إتحرك ..
وقليبي بينتقل من يد لإيد .
والقطر بيصرخ ويدَودِو
اتدلدلت بوسطي من الشباك ..
( خذي بالك م الولد .. راعي عزيزه وعيد )
والقطر صرخ ورمح لكإنه داس على بصة نار ..
ولقطت الحس قريب .. قد ما كنتي بعيد :
(قلبي معاك يا حراجي هناك في أسوان ..)
...........................
ورميت نفسي وسط الجدعان .. وبكيت ..
وبلدنا اللي كنا بنمشيها ف نص نهار
كان القطر في لحضه .. فاتها بمشوار .
سامحيني يا فطنه على التأخير ..
ولو الورقه يا بت الخال تكفي
لأعبي لك بحر النيل والله بكفيِ
وختاماً ليس ختام ..
بابعت لك ِ
ليكي ولناس الجبلايه ولبتي عزيزه والواد عيد
ألف سلام
زوجك ... لوسطى حراجي
***
أسوان
زوجي الغالي
لاوسطى حراجي القط
العامل في السد العالي
جبلاية الفار
الرسالة 2
زوجي حراجي ..
فوصلنا خطابك ..
شمينا فيه ريحة الأحباب .. ربنا ما يوري حد غياب ..
مش أول مره البسطاوي يخطي عتبة الدار ؟؟
عمرنا يا حراجي .. ما جلنا جواب .
النبي ساعة مرزوق البسطاوي .. ما نده ..
كده زي ما كون .. دقت في حشايا النار .
وكإن العمر بيصدق .. بعد ما كان كداب ..
اتأخرت مسافه كبيرة كبيرة علي
عارف فاطنه يا حراجي لاليها عايل .. ولا خي .
ليه تتأخر كده يا حراجي .. ؟
طب والنبي كأن ورقتك دي
أول قنديل بتهز ف جوف الدار .
أول ندعة ضو.
الدار من غيرك يا أيو عزيزه .. هو .
وعزيزه وعيد ..
من غيرك يا حراجي زي اليُتما في العيد .
الواد على صغره حاسس بالغربه والبعد .
ولا عاد حتى بيطلع يلعب في القمَارى مع الولِد .
اطلع وأخش .. أطلع وأخش القاه .. غيمان
وكأنه محروق له دكان .
ويقوللي : (( فين يامه أسوان .. ؟
وأبا سابنا ليه يا مه ؟ ما يمكن زعلان .. ؟ ))
شهرين يا بخيل ؟
ستين شمس وستين ليل ؟
النبي يا حراجيما أطول قلبك
لاقطع بسناني الحته القاسيه فيه
..........................
كل الجبلايه تسلم فرداً فرد ..
م الحاج ((( طِلب حامد )) لعيلة بيت (( علي سعيد ))
وانشالله يا حراجي ما يوريني فيك يوم
وانشالله تكون تعلمت ترد قوام .
ومادام احنا راسيين ع العنوان
والله ما حنبطل بعتان..
مفهوم..أسوان
زوجي الغالي
لاوسطى حراجي القط ..
العامل في السد العالي
زوجتك
فاطنه أحمد عبد الغقار
جبلايه الفار
***
أسوان
الرساله 3
الجوهره المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار
أما بعد ..
فهذا تاني خطاب ..
باعتين طيه ما قدرنا المولى عليه ..
وعنبعتلك في ظرف الجمعه .. طرد
الطرحه والجزمه بتوعك ..
وكساوي عزيزه وعيد .
دورت الحسبه ف راسي وقلت يا واد يا حراجي ..
هو يعني قانون العيل ما يدوقشي الكسوه ..
غير في العيد ؟
أمال كيف العيل حيحس أبوه جنبه
إذا كان الأب .. بعيد .. ؟
بقى أول ما دلقنا يا فاطنه بابور السد على محطة إسوان
أنا والجدعان
حسيت بالدوخه
مش أول مره باسيب جبلاية الفار .. ؟
رحنا المكتب
طبعنا البطاقات ..
ومضينا على الورقات
أه يا (( فطاني )) لو شوفتي الرجاله هْنِهْ
قولي .. ميات .. أولوفات ..
بحر من ولاد الناس ..
إللي من (( درجا )) واللي م (( البتانون ))
واللي من (( أصفون)) و (( التل))
جدعان .. زي عيدان الزان .. سايبن الأهل .
وتطلي في عين الواحد يا ولداه ع الغربه ..
عارفه يا مرتي الراجل في الغربه يشبه إيه .. ؟
عود دره وحداني .. في غيط كمون ..
حسيت بالخوف ناشع في عروقي زي البرد .
قضينا الليله الأولانيه في أي مكان .
العين مشقوقه..
والبال ..
زي الغله اللي بتسرسب من يد الكيال
وندهت عليكي قلت : انا بنده
امعاني ؟
سامعيني يا عيال ؟
النبي لولا الخوف واللومه من الرجاله ..
لاركبت القطر وعدت
قبل ما أروح لموظف
قبل ما أرد سؤال.
وقعدت أعقل نفسي وأقول : يا حراجي يا بوي
أمال جيت ليه ؟
الخايف من الغربهة ما يجيش
اتحمل علشان كسوة عيد .. ورغيف العيش
لكإنك ياخي رحت (( الديش ))
من خوفي يا مرتي
قعدت أهدي الرجاله .
فاطنه ..
أول ما تفكي الخمسه جنيه
اطلعي ع الفور ..
وإدي حساب (( عمران )) وجنيه (( بمبة الصباغ ))
والباقي زيحوا بيه القارب
لما يعدلها الرحمن
سلمى ع الوِلد .. وع (( الحاج التايب ))
بلا كتر كلام ..
سلمي على كل اللي لينا فيهم نايب ..
وإوعي يا فطنه لما ارجع وأبص ف وش اللولاد ..
أعرف إن أبوهم كان غايب .
وإحنا هنا بنستنى الجوابات بفروغ صبر
طول ما الجوابات رايحه وجايه .
اعتبري كإني باجي أشوفك..
واجى .
زوجك لاوسطى حراجي
***
أسوان
زوجي الغالي
لاوسطى حرجاي القط
العامل في السد العالي
جبلاية الفار
الرسالة 4
وصلنا الطرد وجانا المبلغ يا حراجي ..
أحياك الرب وأبقاك ألفين عام ..
ولا عاد يقطعلك عاده ولا حس..
ولا يقفل لك كف ..
ولا يطوي من قدامك سجادة الخير والسعاده ..
اما بعد ..
فإحنا وزعنا المبلغ زي ما قلت..
ولعلك ما تشغلش بالك فينا وتبقى في راحة بال ..
إحنا يا حراجي – بعيد الشر- إن ضاقت بينا الحال يكفينا ريال
كفايه علينا البسطاوي الظهر يخطي عتبة الدار
غمبارح .. جانا (( الشيخ قرشي )) .. وخبط ع الباب ..
جه ساعة المغرب
قاللي لا بدن ما نبص لعيد ..
قاللي : (( يا بت المرحوم ..
الواد لازمه الكتاب ..
يو السوق ..
إتدلي هاتي له قلمين بوص .. ودواية .. ولوح )) ..
وضحك .. بعدين قاللي : (( لاحسن يطلع لوح ))
وأنا بيني وبينك يا حراجي عاوزاه يكبر
ويعوضنا عن الأهل ويعمل لنا قيمه ..
عاوزاه تكون قيمته ف جبلاية الفار قيمة القيمه ..
اللي بتقوله عن أسوان يا بوعيد ..
حكايه ولا حكايات أبو زيد ..
هيا يعني .. مش زي بلدنا .. ؟
أمال ناسها بيسووا إيه .. ؟
ما بيشتغلوش ليه ؟
وإنت .. طول عمرك راجل صاحب فاس
فهمهاني دي
لاحسن عامله في راسي زي الخبطه ..
كيف صاحب الفاس يصبح أوسطى .. ؟
صاحبك (( تكروني )) لما أتى بالطرد ..
شيعنا معاه الموجود ..
...............................................
في الليل يا حراجي تهف عليا ما عرف كيف ..
هففان القهوه .. على صاحب الكيف ..
وبامد إيديا في الظلمه ألقاك جنبي ..
طب والنبي صُح ومش باكدب يا حراجي .
وباحس معاك إن الدنيا لذيذه .
كيف حال (( عبد العال التابه )) و (( على اب عباس ))؟ ..
وقوللي يا حراجي ..
بتاكل كيف . ؟ وبتلبس إيه ؟ وبتقلع إيه ؟
بتنام فين ؟
قاعد في المطرح مع مين ؟
مين اللي بيغسلك توبك
وبتتسبح فين .. ؟
...............................................
في نهاية القول ..
أنا رح أشيع عيد ع الكتاب ..
فا إبعت له ووصيه على شد الحيل ..
وجميع الناس في الجبلايه
عايزين لك كل سعاده وخير ..
وبيتمنولك تاني ترجع في السلامه ..
تعمر مصطبتك ..
وتقيد اللنضه في الدار ..
زوجتك
فاطنه أحمد عبد الغفار
جبلاية الفار
***
الجوهره المصونه
والدرر المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار
أسوان
الرساله 5
مشتاق ليكي شوق الأرض لبل الريق ..
شوق الزعلان .. للنسمه .. لما الصدر يضيق
مشتاق .. وإمبارح ..
قاعد .. قدامي عِرق حديد.. وف يدي الفحار ..
غابت عن عيني الحته اللي أنا فيها..
وغابوا الأنفار
تحت النفق .
الضلمه يا فاطنه
بتساعد على سحب الفكر
..
تلاقيكي ولا عارفه الأنفاق.
ولقيت نفسي يا فاطنه طيره مهاجره
والطيره جناحها محتار
ولقيت نفسي على بوابة جبلاية الفار ..
باخد الأحباب بالحضن
كانس كل دروب الجبلايه بديل توبي
طاوي كفوفي وباخبط بيهم على صدر الدار
قلتلي لي مين ؟
مسيت الدمعه ف حزنك بإيدي..
مسيت الدمعه اللي ف حزنك ..
ماعرف خدتك في حضاني ولا إنتي خدتيني ف حضنك
وعزيزه وعيد حواليا بيشدوا الجلابيه
ويشموا ف غيبتي وفي إيديا..
وقعدت بيناتكم .. وبكيت .. وضحكت
لما لمحت عصايتي وتوبي .. وفاسي .. ومداسي
يمكن ساعه .. وقف اللمهندس على راسي ..
ولمس كتفاتي بصابعه .. قمت لفوق ..
طبطب على كتفي ..
وخدني من يدي بره النفقات في النور ..
ضيعنا نص نهار ..
وسألني .. قلت الشوق
قاللي إسمع يا حراجي أقولك ..
ويا فاطنه قعد يحكي ويتكلم ..
ألقط كلمه وميه تروح ..
وكلام .. م اللي يرد الروح ..
وحكى لي عن أسوان والسد ..
وحكى لي عن اللفرنج وعن حرب المينا..
في الجوابات الجايه يا فاطنه عاقولك وإحكي لك ..
اما عن نفسي .. فأنا لا بخيل ولا شي ..
كيف اللي ف قلبي بس يا ناس .. أرويه في جواب .. ؟
أما عن عيد ..
فأنا من بدري يا فاطنه قلت يروح الكتاب ..
وأقل ما فيها ..
عيفُك الخط ويحفظ له كام سوره
والأمر ده بس يا فاطنه يعوز شوره .. ؟
على خيرة الله ..
ووصلنا فطيرك ..
قعمزت ما بين الرجاله وكلناه ..
يعني أنا دقته .. ؟
والنبي بعنيا قعدت أتفرج ع الرجال بياكلوه
كنا طالعين م الشغل نشر عرق ..
بت يا فاطنه ..
النبي في الدنيا .. ما فيه واحده بتسوى فطيره زيك ..
شفت ده في عنين الرجاله ..
سلاماتي لكل اللي يقولك شحوال حراجي
وسلامي لعزيزه وعيد ..
أما نه عليكي لحين ماجي ..
زوجك
لوسطى حراجي
***
أسوان
زوجي الغالي
لاوسطى حراجي القط
العامل في
السد العالي
جبلاية الفا ر
الرساله 6
أما بعد ..
فنعرفكم .. إحنا بخير ..
ولا يلزمنا إلا رؤية وجه الغايبين ..
(( مرزوق البسطاوي )) .. مرته وضعت .. حدفت ولدين
وجوابك وصل الجبلايةإمبارح ..
لكن مرزوق .. ما سرحشي غير اليوم ..
وما دنتو في صحه وعال ..
إحنا ما يلزمناش .. أكتر من ورقه في ظرف ..
ناس الجبلايه كبيراً وصغيراً عاوزين رؤياك .
قوللي يا حراجي بحق ..
عامل كيف بس ف ليل الفرقه .. ؟
واللهي ما خش دماغي حاجه من اللي كاتبه في الورقه ..
ويا خوفي عليك ..
بيقولوا فيه ناس .. ماتوا في اللي إسمه السد ..
طمنا عليك يا حراجي .
.........................................
قسمنا مع بيت العطار .. بلح النخله الشرك ..
إذا كان لازمك منه يا حراجي .. إبعت قول ..
مش راح تاجي .. ؟
طالقالك في البيت فروج ..
علشان لما تعود م الأسوان دي .. تلاقي لك حتة لحم ..
وإم (( علي أب عباس )) مشغوله عليه ..
بدري ما راسلهاش ليه ؟
أهي طول اليوم .. قاعده على العتبيه إيد على خد ..
وماسمكه عود قش بتبكي وتخطط في تراب الدرب ..
طمنا عليه يا حراجي يرضيك المولى ..
وإذا كان عال وف خير ..
الضحك مع الجدعان .. ولا رساله لامه المشغوله أولى .. ؟
قلب الأم أصابه الشوق يا بوعيد ..
يبقى أسخن من رمال القياله لما يقيد
يبقى عش خراب بيسرخ على طيره ..
وعلى أب عباس عارف أمه ..
مالهاش في الدنيا غيره ..
وإمبارح كانت وسط الحريمات ..
قاعده تمسح دمعتها .. ف طرحتها وتقول :
اللي مانعني من الموت ..
اليوم اللي أشوف (( علي )) فيه متهني وفاتح بيت ..
يومها أقول للدنيا ضحكت عليكي
خلاص غوري ..
قولله يشيع يا حراجي .. الناس زعلانه ..
كل الجبلاي واخده في خاطرها منه ..
وإمه عنيها كستها الدخانه ..
أختك (( نظله ))
رجعت بيت الحاج ركابي إمبارح من (( درجا ))
قالت جايه تريح عند خالاتها وحتولد في اللي يهل ..
يا حراجي .. جوابك بيرد الميه للزور الناشف ويبل .
ده إحنا عايشين هنا ع السيره ..
وزادنا الأخبار ..
زوجتك
فاطنه أحمد عبد الغفار
جبلاية الفار
زمن عبدالحليم
فينك يا عبد الحليم
فين صوتك اللى كان
فرح وهموم
وكان سما بنجوم
اللى طلع م القلب
عارف يعيش..ويدوم
فينك يا عبد الحليم
فينك
يا احلا من يغنى الفراق
تيجى تغنى زحمة الشهداء
والدم فى فلسطين
وعلى توب العراق
فينك يا عبد الحليم
فينك يا زارع الحلم
بعد الحلم
بعد الحلم
الدنيا.. ريح.. وغيوم
الدنيا ..موت ..وسموم
ولا حد سامع
صرخة المظلوم
ولا انة المهموم
الدنيا منتظرة صوتك
ومحوشالك هم
اكتر من الايام
الدنيا منتظرة صوتك
ليه رحت قوام
ضاقت مساحة الكلام
والشوك
ما زال يوعد بصحبة ورد
الشوك خسيس
عمره ما يوفى بعهد
الشوك- كما تعرف
خبيث ..خوان
وفجرنا اعمى
ساكت ما لهش ادان
وكل صبح جديد
بحزن قديم
فينك يا عبد الحليم
لا عاد حبيب ينضم
ولا عبير ينشم
ولا ضحكة ملو الفم
هربت ليه يا عم
مش كنت تنتظر الليالى الهم
ملونة فلسطين
بطعم الدم
والضحكة
اناتنا ..اذا تتلم
وكل مانشد الامل
ننشد
الكل راحل .. والجناح منحول
فى غربة تقتل قلبنا المقتول
رحل فى صوتك
احلى ما فى صوتى
ورحل بموتك
فرحتى بموتى
هاربة الحدود وبيطاردها الحد
الاغتصاب
ما لوش حدود ولا حد
كله بيرحل
من دموع الخد
للشهدا
نايمين ع الكتاف .. واليد
ابدان
بطول حزن الحياة ..تتمد
صوت البيوت الطيبة
بتتهد
صرخة وليد اخضر
صرخها بجد
الطيارات
الحراتات
الجرافات
تقتل تاريخ الارض
والحزن
خيط ضى الاسى الممتد
الحزن صاحب حميم
فينك يا عبد الحليم
فينا احنا يا عبد الحليم دلوقت
مين اللى قتل الثانى فينا
احنا والا الوقت
اتعسا فى الحياه
النوم وقلة الانتباه
الصمت والصوت
يبقوا شىء واحد
سكت والا نطقت
الكل فى البعد اتنسى صوته
وانا اللى للصوت القديم
اشتقت
فينك يا عبد الحليم
فات ايه
وامتى
وكام
هل لما غنينا الوطن
كنا بنفرش بيه على الرصفان
وناكل الساقطة من الاغصان
نتجاهل النكسة ورا النكسة
ونندغ التواريخ والاحزان
ويشتم الشاتم
نقول " احسنت
والامة تدخل دايرة التحريم
فينك يا عبد الحليم
انا هنا
اشبه غروب لشعر والاحلام
انا هنا
مطرح ما مديت ايد وقلت سلام
فارش فى ضلة حيرة الايام
انا ياللى كنت مليح
والخلق شردها عويل الريح
الدنيا تزحم فى طريق مسدود
تلف قدامى وخلفى عباد
وكانى مش موجود
وكان عمرى ما خش قلبى ناس
فى وشى تقرا ملامح الامة
الضلمة نور والنور جبال ضلمة
اهتف انادى بحق من غير صوت
اهتف انادى حق
شبعان موت
اتدلدلت فتايل القناديل
واتنجست سجادة المواويل
مهر الفساد
وسط الخلا مفلوت
وباقول يا ليل
ارواحنا متباعة بتمن الموت
كل الجرتح ما تئن
شوقى القديم بيحن
لحبر غير الحير
وشعر غير الشعر
وسن غير السن
ازاى هربت
من البلا الى يجن
وزمن ينسى اللى يئن..يئن
تعال شوف الدنيا
من غير حسن من غير ناس
وانا بنفس الؤم
نفس الطريقة القديمة
فى زحام البكم
بارخى لجامى
واخدع السياس
فينك يا عبد الحليم
مين اللى
هيحصد آهات الارض
ويبلغ الاحساس
انا اللى مسكون بالسكوت
لو موت ..ما نيش ملفوت
وانت
بتضحك جنب منى ..تفوت
الكدب مالى الكون
الكدب ما لوش لون
الكدب ..بلع الالسنة والصوت
مين اللى ردم اللون ده
فى الاحزان
مين اللى ردم الاهل
تحت الهد
مين اللى خان يونس
سؤال فى خان يونس
عليه
ما جاوبنى ابدا..حد
فينك يا عبد الحليم
الامة بتعانى وبتعانى
ما عادتش نفس الامة
نفس الخلق
والكدب
ما عادش زى ما كان ايامك
زما عادش نفس الحق هوة الحق
ارحل باحلامك
رحل زماننا يا صاحبى
قدامى وقدامك
وامتك
بكدبها اتباهت
الامة
فى دروب الاسى تاهت
الامة زى العادة بتعانى
لكن معاناه ..كدب ..برانى
مش زى ما كانت
آدى المسيح
شايل صليب تانى
اظنه غير دكهة
دهه..باهت
عن وصفه عاجزة كل احزانى
والعدرا
من يوم البكا بتبكى
ولدها مقتول
ع الصليب..متكى
الدمع مات
من كتر ما ناحت
كل النسا فى ارض وجيل
ليها ولاد ماتت
العدرا تبكيهم سوا..وتئن
تبكى
وتتدارى ف صليب الابن
يا ام المسيح
من قعدتك قومى
آدى الصهاينة بيمشوا فى دروبى
وقلعونى ..ومشيوابهدومى
والحزن
فى القلب القديم ..فاحت
وف كربلاء
آدى الشهيد..محمول
كل العراق
زى الحسين مقتول
والدنيا فاهمة
وانا اللى لسه غشيم
فينك يا عبد الحليم
اهو زى ما سبتنى
يوم الرحيل ونويت
وسمعت بالموتة وانا
باعبر طريق..ومشيت
ولا كانك مت
كملت خطوى وفت
ما حصلش غير
طراطيش اغانى وضحك
وهموم وطنية
تمر زى الطير
وصوت
ما عادش يدق باب البيت
وانا فى الحقيقة
مش باقول مشتاق
عشان مشتاق
كل الحكاية
فى زنقة الاوطان
وميلة الميزان
لما تخوى حدادى اللوعة
والغربان
كنت انت نافعنى
اذا قلت يا فلسطين او يا عراق
او اغنى احلامنا اللى ضاعوا هباء
وكل يوم اوطان
بيغيبوا فى الاجواء
يغيب عنا الصوت
وتفضل الاصداء
ويتملى الجورنان
بضحكة الاعداء
وقليلة ع الكلب
قولة لئيم
وانا فينك يا عبد الحليم
كتبت سطرين
بس كنت حزين
ادى ورقتى لمين
فينك
نغنى تانى موال النهار
يا صاحب الرحلة ف طريق الشوك
انت ما متش
هم شبعوا موت
المسالة مش صوت
المسالة
هم الجميع يتحضن
المسالة
تترجم المعاناة..وطن
المسالة امتنا فى التيه
تفتكر
وتنتفض
وتعود
تنفض غبار الياس
على رمل الحدود
نمر من باب الوجود
نعيش جنود ونموت حنود
نفضح ونهزم العدو
مازال يحاربنا بكل سلاح غشيم
نفضح ونهزم العدو
نفس العدو الندل القديم
كما فعلنا ف مصر
لاجل النصر
مش ده اللى خلاك فى الضمير
عبد الحليم
القلب الأخضراني
أنا كل ماأجول التوبة يا بـوي
وحشاني عيونه السوده يا بوي *******
متغـرب والليالـى يـا بـوي والرمش اللي مسهرني يا بوي أنا كل ما أجول التوبة يا بوي وحشاني عيونه السوده يا بوي ********
يا رموش قتاله وجارحه يا بوي أد يكى العمر بحاله يـا بـوي ********
أنا كل ما أجول التوبة يا بوي وحشاني عيونه السوده يا بوي ********
القلـب لأخضرانـى يابـوى ولا قادر طول غيبكم يا بـوي أنا كل ما أجول التوبة يا بوي وحشاني عيونه السوده يا بوي ********
أنا كـل مـا أجـول التوبـة
--------------------------------------------------------------------------------
أحزاني العاديه
وفجأة
هبطت على الميدان
من كل جهات المدن الخرسا
الوف شبان
زاحفين يسألوا عن موت الفجر
استنوا الفجر ورا الفجر
ان القتل يكف
ان القبضه تخف
ولذلك خرجوا يطالبوا
بالقبض على القبضه
وتقديم الكف
الدم
قلب الميدان وعدل
وكأنه دن نحاس مصهور
انا عندى فكرة عن المدن
اللى يكرهها النور
والقبر اللى يبات مش مسرور
وعندى فكرة عن العار
وميلاد النار
والسجن فى قلبى مش على رسمه سور
قلت له لأ يا بيه
انا اسف
بلدى بربيع وصباح
ولسه فى صوتى هديل الينابيع
لسه فى قلبى صهيل المصباح
لسه العالم حيى رايح جى
بيفرق بين الدكنه وبين الضى
بلدى مهما تتضيع مش حتضيع
ما ضايع الا ميدان وسيع
يساع خيول الجميع
يقدم المقدام
ويفرسن الفارس
ويترك الشجاعه للشجيع
ولا باعرف ابكى صحابى غير فى الليل
انا اللى واخد على القمر
ومكلمه اطنان من الشهور
وعلى النظر من خلف كوة فى سور
واللى قتلنى ما ظهر له دليل
وفى ليله التشييع
كان القمر غافل ..مجاش
والنجم كان حافل
لا بطل الرقصه ولا الارتعاش
لما بلغنى الخبر
اتزحم الباب
وجونى الاحباب
ده يغسل ..ده يكفن ..ده يعجن كف تراب
وانا كنت موصى لا تحملنى الا كتوف اخوان
اكلوا على خوان
وما بينهمش خيانه ولا خوان
والا نعشى ما حينفدش من الباب
ما اجمل نومه على كتوف اصحابك
تنظر صادقك من كدابك
تبحث عن صاحب انبل وش
فى الزمن الغش
والرؤيه قصادى اتسعت
بصيت واحسب نفسى بين خلان
تعالوا شوفوا الدنيا من مكانى
حاشتنا اغراض الحياه عن النظر
بالرغم من نبل الالم والانتظار
اتعلمنا حاجات اقلها الحذر
ونمنا سنوات مدهشه
نحلب ليالى حلمنا المنتظر
وامتلات الاسواق بالمواكب
تبيع صديد الوهم والمراكب
وفارشه بالوطن على الرصيف
بالفكر والجياع والكواكب ومذله الرغيف
شويه فات سقراط
مسلسلينه من القدم للباط
ومتهم باليأس والاحباط
وبالعدم وبالزنا وباللواط
وبكل كافه التهم
وهو عابر للجحيم على الصراط
ينظر على الشعب التعيس ويبتسم
الى الجحيم للفلسفه
دنيا لا كانت يوم
ولا حتكون فى يوم كويسه
دنيا فى هيأة خنفسة
دنيا فسه
ما اتعس الانسان
ما اسعد الحيوان
وعبر
وصف من الزوانى وراه
متلطخين بالبودرة والمعاجين
حاصرين غطاوى الروس
بطونهم عريانين
بيغنوا طوبى لضحكه المساجين
وعيال عرايا
تفيض بها الطرقات
من القرى ومن المقاطعات
اطفال فى لون الجوع
صوت النفس مسموع
اطفال شبه وضلوع
اما انا
فاتسعت الرؤيا
وبصيت للمسا وللحياه المتعسه
وللنسايم المنعسه
وقلت ورا سقراط
دنيا فى هيئه خنفسه
ما اتعس الانسان
ما اسعد الحيوان
قبل مرورى على بعض مكان
كنت موصى يمه افوت
هجمت من الحارة مجموعه نسوان
رجعوا بالصوت
قالوا يا عبد الرحمن
وقدرت تموت
وتفوت اللحم العارى المتهان
فى المدن اللى معداش منها ريحه انسان
انا مت
ومش منظور لى جواب
متحصن بكتوف الاصحاب
ولذلك فت
عند التربه
قعد الشيخ اوصانى
وادانى كتابى بيمانى
قال لى لو جولك ملكان
قول انا عبد الله مش عبد الرحمن
ودعا لى فى لحظه ما يقوم للعدل ميزان
ينوبنى شىء من العفو وبعض الغفران
وفى لحظه ما انا متزحلق
فى قماشى الابيض
من جوف القبر
التقدم ضابط واتعرض
قبض على الجثه
وطلب الاوراق
مزع الاكفان
عدل الوش
ووقف وركلنى
وقالى بلؤم شديد
حتى فى الموت بتغش
شيلوه
ولقيت نفسى والعربيه داخله القلعه
كانت الدنيا ضجيج والشمس نيران والعه
قوم يا انسان
انا قلت
انا عبد الله مش عبد الرحمن
زى ما الشيخ اوصانى
قالى عندى اوراق تثبت انك مش مرتاح
امرك فاح
ولقيت نفسى محاصر تانى وتحت الرجلين
قلت لنفسى وبعدين
راح تفضل كده لامتى يا غلبان ؟
بتدارى ايه ؟
ايه باقى تانى علشان تبقى عليه ؟
وطنك ؟
متباع
سرك ؟
متذاع
الدنيا حويطه وانت بتاع
ويهين المعنى الضابط
ويدوس بالجزمه على الحلم
ربنا رازجه بجهل غانيه عن كل العلم
ماذا تعنى بالكون يا يساعك يا يسعنى ؟؟
رد يا جربان يا ابن الوسخة ياكلب
اظنك حتقولى تانى الشعب
وصفعنى وتنى على بطنى بالكعب
يا سعادة البيه وانا ايه؟ او ليا فى العمال ايه ؟
ما تضيع الدنيا والعمال دى تغور
يا صاحب هذا المبنى الموروث
ضل جدودك فى الجدران مغروس
انت السلطان وانا المملوك
انت السجان وانا المهلوك
انت المنصور وانا المسفوك
انا الصعلوك وامتى الصعلوك
يقدر يتجاسر على السلطان
اللى فى ايده بدل البرهان مليون برهان
رفع الهد
ماهو برضه دول يفهموا فى الكدب
اول ما اتلفت جه غارس الجزمه فى قورتى
وجيت اقعد بركنى على الاسفلت
ولقيت نفسى محاصر تانى وتحت الرجلين
قلت لنفسى وبعدين
راح تفضل كده لامتى يا غلبان ؟
ما لقتش الراحه فى الموت
يمكن تلاقيها ورا القضبان
اطلعت على الشبابيك وعلى القضبان
على الموقف
على السجن وعلى السجان
ولقيتنى طول عمرى كنت كده
كلب ..محاصر ..متهان ..منبوذ ..جربان
وانا يا ابنى الحلم اللى ما لهش اوان
معروف عشى فى قلب البستان
معروف صوتى فى زمن الاحزان
وفى اى زمان
واتذكرت سنه ما اتبنت القلعه
وكنت انا اول مسجون
وكان الضابط ده اول سجان
يوم ما ركلنى نفس الركله
يوم ما صفعنى نفس الصفعه
نفس طريقه الركل
وآخر الليل جانى بدم صحابى فى الاكل
استأذنت ارتب اقوالى
قفل الباب
واتفتح الباب
وخلاص
يا عم الضابط انت كداب
واللى باعتك كداب
مش بالذل حاشوفكم غير
ولا استرجى منكم خير
انتم كلاب الحاكم
واحنا الطير
انتم التوجيه واحنا السيل
انتم لصوص القوت
واحنا بنبنى بيوت
احنا الصوت ساعه ما تحبوا الدنيا سكوت
احنا شعبين ..شعبين ..شعبين
شوف الاول فين ؟؟
والتانى فين ؟؟
وآدى الخط ما بين الاتنين بيفوت
انتم بعتم الارض بفاسها ..بناسها
فى ميدان الدنيا فكيتوا لباسها
بانت وش وضهر
بطن وصدر
والريحه سبقت طلعه انفاسها
واحنا ولاد الكلب الشعب
احنا بتوع الاجمل وطريقه الصعب
والضرب ببوز الجزمه وبسن الكعب
والموت فى الحرب
لكن انتم خلقكم سيد الملك
جاهزين للملك
ايديكم نعمت من طول ما بتفتل ليالينا الحلك
احنا الهلك وانت الترك
سواها بحكمته صاحب الملك
انا المطحون المسجون
اللى تاريخى مركون
وانت قلاوون وابن طولون ونابليون
الزنزانه دى مبنيه قبل الكون
قبل الظلم ما يكسب جولات اللون
يا عم الضابط
احبسنى
سففنى الحنضل واتعسنى
رأينا خلف خلاف
احبسنى او اطلقنى وادهسنى
رأينا خلف خلاف
واذا كنت لوحدى دلوقت
بكره مع الوقت
حتزور الزنزانه دى اجيال
واكيد فيه جيل
اوصافه غير نفس الاوصاف
ان شاف يوعى
وان وعى ما يخاف
انتم الخونه لو يصدق ظنى
خد مفاتيح سجنك واترك لى وطنى
وطنى غير وطنك
ومشى
قلت لنفسى
ما خدمك الا من سجنك
المتهم
عشب الربيع مهما اندهس
بالقدم
أو انتنى في الريح
بيشب تاني لفوق
يغني للخضره وطعم الألم
حبيبتي وإن يسألوكي
قولى مسافر بعيد
رايح يقابل العيد
على قلعة فوق الجبل
واللا في سجن جديد
في غرفة ضيقة في ساحة
الإعدام
يرمى الرصاص واللا
الخلاص
في خية المشنقة
مشوار بعيد المعنى
عالي الصوت
إذا مارحتوش أموت
وعالمي ينقفل
والشمس تسحب خيوطها وتنسحب في خجل
وسعيد كل ما قربت المواعيد
وهل فجر جديد
سعيد بكل اللى متألمه
كل الألم في الدنيا متعلمه
في زماننا ده ما أخيب اللى
الحزن يفطمه
تعبت أقرا الوجوه بحثا عن
الإنسان
وتعبت أقرا اليفط بحثا عن
العنوان
كل الخرايط ما توضح تبهت
الأوطان
لكن خلاص كتبت اسمي
بومض الرصاص
وفديت عيون الوطن وفديت
عيون الناس
ويا أمي إن يسألوكي لا
يترعش لك حضن
ولا تحسى بحزن وتقولي مات
في السجن
ساعتها يبقى الحزن بلا
موضوع
والسجن بلا موضوع والموت
بلا أكفان
وكفاية جربنا سنين الموت
بالمجان
والتافه المتهان أهانا
بالمجموع
الموت مجرد سفر
لاشواك ولا زعابين ولا عفر
ولا كلاب بتطل من جورنان
تخطب بألف لسان
تصبغ وجوهنا النيره بأصبغ
الألوان
ويا أمي كل ما يوهموا بموتي
اتذكري صوتي بذمتك مش
كان عظيم الآن
قالت له صوتك نشان
قالت موتك بيان
طالع يقول موجود يا أسمر يا أبو عيون سود
فكيت طلاسم سحرنا
المرصود
وعدلت وش الزمان
سيد طه
زي المسمار القلاووظ
قصير .. وتحس أنه قصيٌر أكتر
لما يقوم
أسمر..وكأنه قديم
الدم صعيدي ما زال
الوش الحامي والقول
صادق ..م القلب
وعمره ما كان كذاب
أو معمول
إذا حط ايديه في مشروع
لا بد يبوظ
صراحته بتفسد أيها موضوع
لكن الصدق
ما بيتبعش بمال
ما دام الدم صعيدي ما زال
ولا بيعرفش الا الصدق
حتي لو هو وولاده
يموتوا من الجوع
حاحكي لك قصة صاصا يا أستاذ
كان صاصا ده قول فرعة وزارعها شيطان
كان أكره شئ عنده هم البريطان
وسياسي صح
بقعد حنب الراديو في ميعاد النشرة
ومعين واحد عنده لقراية الجرنان
مش يعني معينه بمرتب
ليه.. ما تقوله .. معينة بالضرب
لكن كانو بيحبوه والا لاء ؟... ويحموه ولا لاء
بس يا استاذ
كان فيه خبصية والا مفيش
الإنجليز في البر التاني أخدو علم
وصادوهم بفكارزاتهم.. والرشاشين
خراطيش خراطيش
واللهي الميه بين الشطين يومها غلت من سهج النار
قلنا ضاعوا الولدات
وام علي اب سلمي تصرخ وتقول يا ولادي
طلع الشط يوميها بناسه وعياله
من جبلاية السيد هاشم والفار واب عارف
واللي جه من الشلوفة والكمامنتو
صوت الضرب الجامد صحي الناس من النوم
قول وطلعنا النسوان تصرخ
والرجالة بتدعي والعيايل بتقول
يخرب بيتك يا خواجة
يخرب بيتك يا خواجة
مات حد يا سيد طه
ولا حد
واحد بس اتعور كان اسمه غريب
الناس قالت سيدك الغريب ..نجٌاهم فيه
جابهم همٌ سلامه وخد الطلقة في دراعه
طلعوا يا أستاذ من المية
وكنالنا دي في الشتا أسقع م الثلج
ولعنا الفرن
ودفيناهم
حبٌة طلعوا فوق
والباقي كان لافف من حوالين الفرن ف وش النار
وفاكرهم
وكأن ده لسة بيحصل دلوقت تمام
كان بيتنا ورا بيت عم " اب سلمى
وكانت أمي لسة عايشة
برضة بالنسبة لدلوقتي يا " على اب سلمى"
كنا عيال
إي......ه"
وآديكي برضه رجعتي من تاني للشقا ... يا كنال
للنار ... وخراب البيت والهجرة
برضه رجع لك تاني الكاكي
ده أنت غريبة بشكل .... غريبة يا كنال
بتحبينا احنا أكتر
والا بتحبي العسك أكتر؟
والا بتشتاقيلنا احنا لاتنين ؟
بتضايفي دول نوبة
وتضايفي دول نوبة
إحنا في أيام الزرع
وهمٌ في أيام الحرب
عمري ياخي ما شفت "كنان"
بيحب الدان ذي ما بيحب الرمان
الا انتي يا "كنان"
" إحكي لنا يا حاج اب سلمى حكاية كوبري بور توفيق .."
" ليه .. هو لسة فاضل حد ما يعرفهاش؟ "
الموت علي الأسفلت
من الزوايا والأركان
خرج الطوفان:
ألوفات شبان.
إصعد يادخان
إبعد ياشيطان
إجبن ياجبان
رجع الاسم ورجع العنوان.
يغلى البركان
ويفور
ويدور
إتهد السور .. طلع الإنسان.
الصدر العالى عليه الوشم:
خريطة الدم .. فلسطين ياأحلا الأوطان.
مين قال بعنا ..؟
مين قال ضعنا؟
يا تمانية واربعين كدابه وكدابه ياسبعه وتسعين.
التار له نار طى الكتمان
واليوم يا خليل
يا جليل
يا بيت لحم ..الإعلان
يا..صوت الطفل اللى بيحررنى ف بلدى
بارك ربى فيك.....ياولدى
يا..نهر النار الفايره اوعى تبطل جريان
دراعات الوحش الغاضب..أصوات الكروان
راجح
فالح
مازن
مروان
وأخدنا بتارك يا غسان
يا كمال ناصر
دمك حاصر
أعداءك..مش بس فى لبنان
يا ... ماجد يابو شرار جينا
دمك فينا
لسة سامعينك تنيادينا
ما عادتش الدمعة مكتومه
صبحت صرخة
صبحت صرخةروح محمومه
تصفع روما
ع الكتف نشيلوا سرير الفندق ونشيلك
مواويل الثوره مواويلك
تحت قميصك غنوة شهدا
من كل مخيم...
زاحفه يا ماجد تحت الثوره تغنى لك
عطر الآنبياف مناديلك
أولادك يابو شرار بالطوب
عدلوا المقلوب
شطبوا كل القدر المكتوب
فتحوا بوابة الفجر
وواجهوا الغدر
وصاحوا:يا فلسطين
يسقط كل الكدب العربى
يسقط كل الاخوه الخاينين
نرسم بالدم خريطه للآوطان
إتفلت الجان
والمسجون قام ياكْْْْْْْْْْْْْْْْْْْْْْْْْْْْْْْْْْْْْْْْْْْْْْْ ْْْْْْْْْْْْْْْْْْْْْْْْْْْْْْْل السجان
دارت دارت
لعبتهم بارت..
قوتهم خارت.. وانهارت
والدايره على الباغى دارت
دارت .. دارت
يادنان الكبت ..الظلم .. القهر .. على الطرقات .. فارت.
ومخيم بات .. وصبح ميدان
صبح ميدان والدنيا
الدنيا اتحطت واتشالت
يامنه
والله وشبت يا عبد الرُّحمان ..
عجّزت يا واد ؟
مُسْرَعْ؟
ميتى وكيف؟
عاد اللي يعجّز في بلاده
غير اللي يعجز ضيف !!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمان!!
أمال انا على كده مت بقى لي ميت حول!!
والله خايفة يا وليدي القعدة لتطول
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين حاحيا كمان وكمان
عشت كتير
عشت لحد ماشفتك عجّزت يا عبد الرحمان
وقالولي قال خَلَّفت
وانت عجوز خلَّفت يا اخوي؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض
ماشي يا عبد الرحمان
أهو عشنا وطلنا منك بصة وشمة
دلوك بس ما فكرت ف يامنة وقلت: يا عمة؟
حبيبي انت يا عبد الرحمان
والله حبيبي .. وتتحب
على قد ماسارقاك الغربة
لكن ليك قلب
مش زي ولاد الكلب
اللي نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور !!
ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان
آ..با..ي ما مجلّع قوي يا عبد الرحمان..
طب ده انا ليّا ستّ سنين
مزروعة في ظهر الباب
لم طلّوا علينا أحبة ولا أغراب..
خليهم..
ينفعوا
أعملهم أكفان..!!
كرمش وشي
فاكر يامنة وفاكر الوش؟
إوعى تصدقها الدنيا..
غش ف غش..!!
إذا جاك الموت يا وليدي
موت على طول..
اللي اتخطفوا فضلوا أحباب
صاحيين في القلب
كإن ماحدش غاب..
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب
أول مايجيك الموت .. افتح..
أو ماينادي عليك .. إجلح..
إنت الكسبان..
إوعى تحسبها حساب..!!
بلا واد .. بلا بت..
ده زمن يوم مايصدق .. كداب..!!
سيبها لهم بالحال والمال وانفد
إوعى تبص وراك..
الورث تراب
وحيطان الأيام طين
وعيالك بيك مش بيك عايشين..!!
يو.....ه يا رمان..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.
مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!
بناتي رضية ونجية ماتوا وراحوا
وأنا اللي قعدت..
طيِّب يا زمان..!!
إ
إوعى تعيش يوم واحد بعد عيالك
إوعى يا عبد الرحمان..
في الدنيا أوجاع وهموم أشكال والوان..
الناس مابتعرفهاش..
أوعرهم لو حتعيش
بعد عيالك ماتموت..
ساعتها بس ..
حاتعرف إيه هوّه الموت..!!
أول مايجي لك .. نط
لسه بتحكي لهم بحرى حكاية
فاطنة وحراجي القط..؟
آ.. باي ماكنت شقي وعفريت
من دون كل الولدات..
كنت مخالف..
برّاوي..
وكنت مخبي في عينيك السحراوي
تمللي حاجات..
زي الحداية ..
تخوي ع الحاجة .. وتطير ..
من صغرك بضوافر واعرة .. ومناقير..
بس ماكنتش كداب..
وآديني استنيت في الدنيا
لما شعرك شاب..!!
قِدِم البيت..
اتهدت قبله بيوت وبيوت..
وأصيل هوه..
مستنيني لما أموت..!!
حاتيجي العيد الجاي؟
واذا جيت
حاتجيني لجاي؟
وحتشرب مع يامنة الشاي ..؟
حاجي ياعمة وجيت..
لالقيت يامنة ولا البيت
يا أمه قومي
يا أمة قومي بقـي.. ده انتـي فضحتينـا...
الأمريكان سكنـوا مـش وسطينـا.. لأفينـا
والاّ اليهـود اللـي سرقـوا حتـي أغانينـا
حرتوا الأراضي وقتلـوا هنـاك أعـز الولـد
الشهدا أكوام علـي الأكتـاف.. إوعـي تعـد
أبـدان جميلـة.. بتاكلهـا النسـور والحِـدّ
إحنـا انتهينـا... تعالـوا ياللـي بعديـنـا
يا أمة قومـي بقـي لأحسـن فضحتينـا....
الأمريكان سكنوا مـش وسطينـا.. لأفينـا
ياللي فـي عُسـري وضيـق اليـد نسيتونـا
أهي الفلـوس نفسهـا.. حاتـروح لأعادينـا
بترول أراضي العدو ده اللي في أراضينـا.
شفتـوش كـده؟ والبـلاد ممنـوع نحميهـا
نحميها من مين؟ دي مش أراضينا.. أراضيها
هوه بسلاحه المميت.. جـاي ينـزرع فيهـا
وانتو.. بدخان صمتكـم يـا أهلـي عميتونـا
ياللي فـي عسـري وضيـق اليـد نسيتونـا
أهو جه ياكلكوا اللي علي حربه انتو لُمْتونا
يا أمة ترمـي ضميرهـا للكـلاب.. ببـلاش
يا أمة قبلـت مصيرهـا (خدمـة الأوبـاش)
كله كلام.. لا انتماء.. ولا وطـن.. ولا ديـن
قاعدين سنين تحلموا بظهور (صلاح الديـن)
ماكان ما بينكـم قتلتـوه انتـو يـا فالحيـن
كل اللي صدوا العدو.. راحوا ومش راجعيـن
ولا »صلاح دين« يا ناس ولا حتي زفت الطين
الحي ميت يا ناس أمـا اللـي ميـت عـاش
يا أمـة ترمـي ضميرهـا للكـلاب ببـلاش
يا أمـة قبلـت بفرحـة.. خدمـة الأوبـاش
ما اعادش إلا انتظار الموت.. يا إمـا نقـوم
نسجد في ساحة النضال وعن البلاهة نصـوم
لو الدما تبقي بحـر.. فـي دمنـا.. حنعـوم
إزاي يعيش الوطن.. من غير رجال تحميـه؟
تموت وتحيا معـاه.. تمـوت وتحيـا ليـه..
كإن ابن العرب مولـود يـا نـاس.. مهـزوم
ماعادش إلا انتظار المـوت يـا إمـا نقـوم
نحمي الوطن بالصـدور.. ونفجـر المكتـوم
كل الشوارع بتصـرخ فـي المـدن بجنـون
توقّـف الحـرب.. تفضـح فكـرة المجنـون
في أوروبا حتي ف أميركا.. لأ في كل الكون..
إلا احنـا إرتحـنـا قــدام أي تليفـزيـون
آدي العـراق فـي طريقهـا للغـرق يـابـا
واحنـا حواليـه خُطبنـا فجـة... كـدابـة
نتخانقوا من غير سبب.. لأ فيه سبـب طبعـاً
وحنغرقوا في الزمن.. يـا أمتـي.... جمعـاً
متملعنيـن... إنمـا... عدونـا..... ألـعـن
قدَّامُه حملان.. لكين.. علي بعضنـا ديابـة
الكـل عايـز ساعـات المؤتمـر تمضـي..
علشان ما يجري علي دار العـدو.. يمضـي
كـإن بعضـي ينازعنـي.. علـي بعضـي..
معظمنا هوه العدو.. يعني العـراق يـا هـوه
مش أمريكان وانجليز.. إحنا اللـي حنهـدوه
واحنا اللي بترولـه رايحيـن للعـدو نِهْـدوه
وبعده بترول جديد.. وبعـده بتـرول جديـد
وأنا منتظر مقتلـي وإيـدي علـي خـدي
الكـل عـاوز ساعـات المؤتمـر تمضـي..
علشان ما يجري علي دار العـد (يمضـي)
أنا باهيب بالشباب.. إنسوا اللي قضُّوا العمـر
يتكلموا ويخطبوا وسابوا سنينكو... تمُـر...
ده انتـو القلـوب الفتيـة والوجـوه السمـر
ترضـوا تبيعـوا الوطـن بتفاهـة الغايـات؟
وتبقـوا إنتـو وأعـداء الوطـن إخــوات؟
متربصـة بيـكـو أم العولـمـة والـجـات
تتمِسْحوا م الكون كما مسحوا الهنود الحمـر
أنا باهيب بالشباب انسوا اللي قضّـوا العمـر
يتكلمـوا ويخطبـوا وسابـوا سنينكـو تمـر
يا أمة قومي.. وانتي يا مصـر.. ماتونِّيـش
وإلا عشريـن سنـة.. حاتمـر زي مافيـش
تعـلا اليفـط أعـلا مياديـن أمـة الإسـلام
شركـة إسرائيليـة اهـه لصناعـة الأقـلام
واستديـو صهيـون هنـا لصناعـة الأفـلام
والمصنـع الإسرائيلـي لعلبـة الورنـيـش
يا أمة قومي وإنتـي يـا مصـر ماتونيـش
بغداد.. يـا أم التاريـخ والحكمـة والأشعـار
بغـداد يـا أم القصـور والنخـل والأنـهـار
ماعادش إلا الصمود الليل فـي آخـره نهـار
دافعي بشرف واتركـي للأمـة طعـم العـار
ملـو التاريـخ.. الفصـول صادقـة وكدابـة
سنتيـن تقـدَّم.. وألـف.. نعـودوا للغابـة
الأمـة فيـهـا فــرح لأزمـلـه نـدابـه
الدنيـا كلتهـا تهتـف باسـمِـك المظـلـوم
بكره الجراح تندمل.. عُمـر الظـلام مايـدوم
أطفالـك اللـي التاريـخ حيحكـي قصتـهـم
ونساكـي فـي صبرهـم. الدنيـا نسيتـهـم
يا دي العراق العريق صحّي العـرب م النـوم
يا طاعم المحرومين.. إزاي تبات محـروم.؟
ومهما كانـوا الطغـاة.. الـدار لأهـل الـدار
الـدار لأهـل الـدار ، الـدار لأهـل الـدار
البدل
مرثيه لجمال عبد الناصر
أبادْلكُم حرّية .. بسجن.
أبادلكم سِلْم .. بحرب.
أبادلكم صوتى .. بصمت.
أبادلكم اسمى .. بصوت مجهول.
أبادلكم فدادين الطين
بالعتمة فى رطوبة الزنازين.
أبادلكم حاكم عادل بالفرعون الجبار.
الجنّة .. بالنار.
الراحة .. بتعب القلب.
أبادلكم أمن .. بخوف.
زُهرّية ورْد .. بكباية دم.
وحياة مرتاحة أبادلها بموت.
أبادلكم ضِحكاتى .. بغمّ
ورفيقى أبادله بمخبر كلب.
أبادلكم لو كنتوا تبادلونى
تاخدوا سنواتكم وتردُّولى السنوات.
صعب تردُّولى السنوات .
صعب تبادلونى برجوع العزة
ومعنى الوطنية والأوطان ..
للشعب.
ورجوع دمّ الشهداء.
والوجه الأصلى لكلمة أعداء.
ونضارة وجْه الفقراء.
وكرامة تساوى كرامة كلّ اللى اتسلبوا.
والنصر .. لكل اللى من غير حرب
اتغلبوا
بادْلونى .. وجوه بوجوه
ولغات بلغات.
خدوا كل اللى حيلتنا من ألوفات:
اللى اتنهبوا .. واللى لسه حيتنهبوا
وردوا للأمة رجولتها ونخوتها وقُدرتها.
ردُّوها من تابع مذلول
لزعيمة لاستقلال.
من قُطعان سايحة .. لرجال.
ردولها كل اللى سرقتوه من مال.
ادفعوا عنْها ديون الأطفال.
ردوا لها شمس المستقبل
واكنسوا أطنان العتمة من درب الأجيال.
أخلاق الشعب اللى انداس ..
واللى أصبح ناس مش ناس
ردوا للشعب رغيفُه المخطوف.
صوته الأصلى وعرقه المسفُوف.
وبالمجّانى .. رجعوا للطفل الكراس.
ابنوا على شط النيل المصنع جنب المصنع.
رُدوا للجندى المصرى وظيفة المدفع.
ردُّوا الإنسان العادى ياخُدْ قيمةْ ما يدفع.
والفلاح ردوه من ذُل الغربة
وردوله حُبه للفاس.
رُدوا الوطن المسروق
اللى اتمرغ فى مخالب السوق.
فكوا عنه الطوق.
شِلُّوا القدم الصهيونية الساكنة فى الدقى
وماشية فى باب اللوق.
ردُّوا الجمعية للفلاحين
والمصنع للعمال.
لو تقدروا تخرجوا مِ الأغلال
اللى كتفكم بيها اللى علمكم لعبة رأس المال ..
لو غيرتوا الحال ..
أُقسم قدام شعبى أغنى لكم من قلبى
وعمرى ما غنى تانى
لـ .. (جمال)
مجموعه رسايل الاسطى حراجى لزوجته فاطنه عبد الغفار)
...
الجوهرة المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلايه الفار
أسوان ... الرسالة 1
أما بعد .. لو كنت هاودت كسوفي ع التأخير
سامحيني يا فطنه في طول الغيبه عليكم
وأنا خجلان .. خجلان .. وأقولك يا زوجتنا أنا خجلان منكم ..
من هنا للصبح ..
شهرين دلوقت ..
من يوم ما عنيكي يا فاطنه .. بلت شباك القطر ..
لسوعتي بدمعك ضهر يديَ
لحضتها قلت لك :
(( قبل ما عوصل عتلاقي جوابي جي ... ))
نهنهتي .. وقلتي لي بعتاب:
(( النبي عارفاك كداب .. نساي
وعتنسى أول ما عتنزل في أسوان .. ))
حسيت واليد بتخطفها يد الجدعان
بالقلب ف جوفي ما عارف ان كان بردان .. دفيان
والبت عزيزه والواد عيد
قناديل في الجوف .. زي ما بتضوي .. بيقيد ..
.......... والقطر إتحرك ..
وقليبي بينتقل من يد لإيد .
والقطر بيصرخ ويدَودِو
اتدلدلت بوسطي من الشباك ..
( خذي بالك م الولد .. راعي عزيزه وعيد )
والقطر صرخ ورمح لكإنه داس على بصة نار ..
ولقطت الحس قريب .. قد ما كنتي بعيد :
(قلبي معاك يا حراجي هناك في أسوان ..)
...........................
ورميت نفسي وسط الجدعان .. وبكيت ..
وبلدنا اللي كنا بنمشيها ف نص نهار
كان القطر في لحضه .. فاتها بمشوار .
سامحيني يا فطنه على التأخير ..
ولو الورقه يا بت الخال تكفي
لأعبي لك بحر النيل والله بكفيِ
وختاماً ليس ختام ..
بابعت لك ِ
ليكي ولناس الجبلايه ولبتي عزيزه والواد عيد
ألف سلام
زوجك ... لوسطى حراجي
***
أسوان
زوجي الغالي
لاوسطى حراجي القط
العامل في السد العالي
جبلاية الفار
الرسالة 2
زوجي حراجي ..
فوصلنا خطابك ..
شمينا فيه ريحة الأحباب .. ربنا ما يوري حد غياب ..
مش أول مره البسطاوي يخطي عتبة الدار ؟؟
عمرنا يا حراجي .. ما جلنا جواب .
النبي ساعة مرزوق البسطاوي .. ما نده ..
كده زي ما كون .. دقت في حشايا النار .
وكإن العمر بيصدق .. بعد ما كان كداب ..
اتأخرت مسافه كبيرة كبيرة علي
عارف فاطنه يا حراجي لاليها عايل .. ولا خي .
ليه تتأخر كده يا حراجي .. ؟
طب والنبي كأن ورقتك دي
أول قنديل بتهز ف جوف الدار .
أول ندعة ضو.
الدار من غيرك يا أيو عزيزه .. هو .
وعزيزه وعيد ..
من غيرك يا حراجي زي اليُتما في العيد .
الواد على صغره حاسس بالغربه والبعد .
ولا عاد حتى بيطلع يلعب في القمَارى مع الولِد .
اطلع وأخش .. أطلع وأخش القاه .. غيمان
وكأنه محروق له دكان .
ويقوللي : (( فين يامه أسوان .. ؟
وأبا سابنا ليه يا مه ؟ ما يمكن زعلان .. ؟ ))
شهرين يا بخيل ؟
ستين شمس وستين ليل ؟
النبي يا حراجيما أطول قلبك
لاقطع بسناني الحته القاسيه فيه
..........................
كل الجبلايه تسلم فرداً فرد ..
م الحاج ((( طِلب حامد )) لعيلة بيت (( علي سعيد ))
وانشالله يا حراجي ما يوريني فيك يوم
وانشالله تكون تعلمت ترد قوام .
ومادام احنا راسيين ع العنوان
والله ما حنبطل بعتان..
مفهوم..أسوان
زوجي الغالي
لاوسطى حراجي القط ..
العامل في السد العالي
زوجتك
فاطنه أحمد عبد الغقار
جبلايه الفار
***
أسوان
الرساله 3
الجوهره المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار
أما بعد ..
فهذا تاني خطاب ..
باعتين طيه ما قدرنا المولى عليه ..
وعنبعتلك في ظرف الجمعه .. طرد
الطرحه والجزمه بتوعك ..
وكساوي عزيزه وعيد .
دورت الحسبه ف راسي وقلت يا واد يا حراجي ..
هو يعني قانون العيل ما يدوقشي الكسوه ..
غير في العيد ؟
أمال كيف العيل حيحس أبوه جنبه
إذا كان الأب .. بعيد .. ؟
بقى أول ما دلقنا يا فاطنه بابور السد على محطة إسوان
أنا والجدعان
حسيت بالدوخه
مش أول مره باسيب جبلاية الفار .. ؟
رحنا المكتب
طبعنا البطاقات ..
ومضينا على الورقات
أه يا (( فطاني )) لو شوفتي الرجاله هْنِهْ
قولي .. ميات .. أولوفات ..
بحر من ولاد الناس ..
إللي من (( درجا )) واللي م (( البتانون ))
واللي من (( أصفون)) و (( التل))
جدعان .. زي عيدان الزان .. سايبن الأهل .
وتطلي في عين الواحد يا ولداه ع الغربه ..
عارفه يا مرتي الراجل في الغربه يشبه إيه .. ؟
عود دره وحداني .. في غيط كمون ..
حسيت بالخوف ناشع في عروقي زي البرد .
قضينا الليله الأولانيه في أي مكان .
العين مشقوقه..
والبال ..
زي الغله اللي بتسرسب من يد الكيال
وندهت عليكي قلت : انا بنده
امعاني ؟
سامعيني يا عيال ؟
النبي لولا الخوف واللومه من الرجاله ..
لاركبت القطر وعدت
قبل ما أروح لموظف
قبل ما أرد سؤال.
وقعدت أعقل نفسي وأقول : يا حراجي يا بوي
أمال جيت ليه ؟
الخايف من الغربهة ما يجيش
اتحمل علشان كسوة عيد .. ورغيف العيش
لكإنك ياخي رحت (( الديش ))
من خوفي يا مرتي
قعدت أهدي الرجاله .
فاطنه ..
أول ما تفكي الخمسه جنيه
اطلعي ع الفور ..
وإدي حساب (( عمران )) وجنيه (( بمبة الصباغ ))
والباقي زيحوا بيه القارب
لما يعدلها الرحمن
سلمى ع الوِلد .. وع (( الحاج التايب ))
بلا كتر كلام ..
سلمي على كل اللي لينا فيهم نايب ..
وإوعي يا فطنه لما ارجع وأبص ف وش اللولاد ..
أعرف إن أبوهم كان غايب .
وإحنا هنا بنستنى الجوابات بفروغ صبر
طول ما الجوابات رايحه وجايه .
اعتبري كإني باجي أشوفك..
واجى .
زوجك لاوسطى حراجي
***
أسوان
زوجي الغالي
لاوسطى حرجاي القط
العامل في السد العالي
جبلاية الفار
الرسالة 4
وصلنا الطرد وجانا المبلغ يا حراجي ..
أحياك الرب وأبقاك ألفين عام ..
ولا عاد يقطعلك عاده ولا حس..
ولا يقفل لك كف ..
ولا يطوي من قدامك سجادة الخير والسعاده ..
اما بعد ..
فإحنا وزعنا المبلغ زي ما قلت..
ولعلك ما تشغلش بالك فينا وتبقى في راحة بال ..
إحنا يا حراجي – بعيد الشر- إن ضاقت بينا الحال يكفينا ريال
كفايه علينا البسطاوي الظهر يخطي عتبة الدار
غمبارح .. جانا (( الشيخ قرشي )) .. وخبط ع الباب ..
جه ساعة المغرب
قاللي لا بدن ما نبص لعيد ..
قاللي : (( يا بت المرحوم ..
الواد لازمه الكتاب ..
يو السوق ..
إتدلي هاتي له قلمين بوص .. ودواية .. ولوح )) ..
وضحك .. بعدين قاللي : (( لاحسن يطلع لوح ))
وأنا بيني وبينك يا حراجي عاوزاه يكبر
ويعوضنا عن الأهل ويعمل لنا قيمه ..
عاوزاه تكون قيمته ف جبلاية الفار قيمة القيمه ..
اللي بتقوله عن أسوان يا بوعيد ..
حكايه ولا حكايات أبو زيد ..
هيا يعني .. مش زي بلدنا .. ؟
أمال ناسها بيسووا إيه .. ؟
ما بيشتغلوش ليه ؟
وإنت .. طول عمرك راجل صاحب فاس
فهمهاني دي
لاحسن عامله في راسي زي الخبطه ..
كيف صاحب الفاس يصبح أوسطى .. ؟
صاحبك (( تكروني )) لما أتى بالطرد ..
شيعنا معاه الموجود ..
...............................................
في الليل يا حراجي تهف عليا ما عرف كيف ..
هففان القهوه .. على صاحب الكيف ..
وبامد إيديا في الظلمه ألقاك جنبي ..
طب والنبي صُح ومش باكدب يا حراجي .
وباحس معاك إن الدنيا لذيذه .
كيف حال (( عبد العال التابه )) و (( على اب عباس ))؟ ..
وقوللي يا حراجي ..
بتاكل كيف . ؟ وبتلبس إيه ؟ وبتقلع إيه ؟
بتنام فين ؟
قاعد في المطرح مع مين ؟
مين اللي بيغسلك توبك
وبتتسبح فين .. ؟
...............................................
في نهاية القول ..
أنا رح أشيع عيد ع الكتاب ..
فا إبعت له ووصيه على شد الحيل ..
وجميع الناس في الجبلايه
عايزين لك كل سعاده وخير ..
وبيتمنولك تاني ترجع في السلامه ..
تعمر مصطبتك ..
وتقيد اللنضه في الدار ..
زوجتك
فاطنه أحمد عبد الغفار
جبلاية الفار
***
الجوهره المصونه
والدرر المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار
أسوان
الرساله 5
مشتاق ليكي شوق الأرض لبل الريق ..
شوق الزعلان .. للنسمه .. لما الصدر يضيق
مشتاق .. وإمبارح ..
قاعد .. قدامي عِرق حديد.. وف يدي الفحار ..
غابت عن عيني الحته اللي أنا فيها..
وغابوا الأنفار
تحت النفق .
الضلمه يا فاطنه
بتساعد على سحب الفكر
..
تلاقيكي ولا عارفه الأنفاق.
ولقيت نفسي يا فاطنه طيره مهاجره
والطيره جناحها محتار
ولقيت نفسي على بوابة جبلاية الفار ..
باخد الأحباب بالحضن
كانس كل دروب الجبلايه بديل توبي
طاوي كفوفي وباخبط بيهم على صدر الدار
قلتلي لي مين ؟
مسيت الدمعه ف حزنك بإيدي..
مسيت الدمعه اللي ف حزنك ..
ماعرف خدتك في حضاني ولا إنتي خدتيني ف حضنك
وعزيزه وعيد حواليا بيشدوا الجلابيه
ويشموا ف غيبتي وفي إيديا..
وقعدت بيناتكم .. وبكيت .. وضحكت
لما لمحت عصايتي وتوبي .. وفاسي .. ومداسي
يمكن ساعه .. وقف اللمهندس على راسي ..
ولمس كتفاتي بصابعه .. قمت لفوق ..
طبطب على كتفي ..
وخدني من يدي بره النفقات في النور ..
ضيعنا نص نهار ..
وسألني .. قلت الشوق
قاللي إسمع يا حراجي أقولك ..
ويا فاطنه قعد يحكي ويتكلم ..
ألقط كلمه وميه تروح ..
وكلام .. م اللي يرد الروح ..
وحكى لي عن أسوان والسد ..
وحكى لي عن اللفرنج وعن حرب المينا..
في الجوابات الجايه يا فاطنه عاقولك وإحكي لك ..
اما عن نفسي .. فأنا لا بخيل ولا شي ..
كيف اللي ف قلبي بس يا ناس .. أرويه في جواب .. ؟
أما عن عيد ..
فأنا من بدري يا فاطنه قلت يروح الكتاب ..
وأقل ما فيها ..
عيفُك الخط ويحفظ له كام سوره
والأمر ده بس يا فاطنه يعوز شوره .. ؟
على خيرة الله ..
ووصلنا فطيرك ..
قعمزت ما بين الرجاله وكلناه ..
يعني أنا دقته .. ؟
والنبي بعنيا قعدت أتفرج ع الرجال بياكلوه
كنا طالعين م الشغل نشر عرق ..
بت يا فاطنه ..
النبي في الدنيا .. ما فيه واحده بتسوى فطيره زيك ..
شفت ده في عنين الرجاله ..
سلاماتي لكل اللي يقولك شحوال حراجي
وسلامي لعزيزه وعيد ..
أما نه عليكي لحين ماجي ..
زوجك
لوسطى حراجي
***
أسوان
زوجي الغالي
لاوسطى حراجي القط
العامل في
السد العالي
جبلاية الفا ر
الرساله 6
أما بعد ..
فنعرفكم .. إحنا بخير ..
ولا يلزمنا إلا رؤية وجه الغايبين ..
(( مرزوق البسطاوي )) .. مرته وضعت .. حدفت ولدين
وجوابك وصل الجبلايةإمبارح ..
لكن مرزوق .. ما سرحشي غير اليوم ..
وما دنتو في صحه وعال ..
إحنا ما يلزمناش .. أكتر من ورقه في ظرف ..
ناس الجبلايه كبيراً وصغيراً عاوزين رؤياك .
قوللي يا حراجي بحق ..
عامل كيف بس ف ليل الفرقه .. ؟
واللهي ما خش دماغي حاجه من اللي كاتبه في الورقه ..
ويا خوفي عليك ..
بيقولوا فيه ناس .. ماتوا في اللي إسمه السد ..
طمنا عليك يا حراجي .
.........................................
قسمنا مع بيت العطار .. بلح النخله الشرك ..
إذا كان لازمك منه يا حراجي .. إبعت قول ..
مش راح تاجي .. ؟
طالقالك في البيت فروج ..
علشان لما تعود م الأسوان دي .. تلاقي لك حتة لحم ..
وإم (( علي أب عباس )) مشغوله عليه ..
بدري ما راسلهاش ليه ؟
أهي طول اليوم .. قاعده على العتبيه إيد على خد ..
وماسمكه عود قش بتبكي وتخطط في تراب الدرب ..
طمنا عليه يا حراجي يرضيك المولى ..
وإذا كان عال وف خير ..
الضحك مع الجدعان .. ولا رساله لامه المشغوله أولى .. ؟
قلب الأم أصابه الشوق يا بوعيد ..
يبقى أسخن من رمال القياله لما يقيد
يبقى عش خراب بيسرخ على طيره ..
وعلى أب عباس عارف أمه ..
مالهاش في الدنيا غيره ..
وإمبارح كانت وسط الحريمات ..
قاعده تمسح دمعتها .. ف طرحتها وتقول :
اللي مانعني من الموت ..
اليوم اللي أشوف (( علي )) فيه متهني وفاتح بيت ..
يومها أقول للدنيا ضحكت عليكي
خلاص غوري ..
قولله يشيع يا حراجي .. الناس زعلانه ..
كل الجبلاي واخده في خاطرها منه ..
وإمه عنيها كستها الدخانه ..
أختك (( نظله ))
رجعت بيت الحاج ركابي إمبارح من (( درجا ))
قالت جايه تريح عند خالاتها وحتولد في اللي يهل ..
يا حراجي .. جوابك بيرد الميه للزور الناشف ويبل .
ده إحنا عايشين هنا ع السيره ..
وزادنا الأخبار ..
زوجتك
فاطنه أحمد عبد الغفار
جبلاية الفار
زمن عبدالحليم
فينك يا عبد الحليم
فين صوتك اللى كان
فرح وهموم
وكان سما بنجوم
اللى طلع م القلب
عارف يعيش..ويدوم
فينك يا عبد الحليم
فينك
يا احلا من يغنى الفراق
تيجى تغنى زحمة الشهداء
والدم فى فلسطين
وعلى توب العراق
فينك يا عبد الحليم
فينك يا زارع الحلم
بعد الحلم
بعد الحلم
الدنيا.. ريح.. وغيوم
الدنيا ..موت ..وسموم
ولا حد سامع
صرخة المظلوم
ولا انة المهموم
الدنيا منتظرة صوتك
ومحوشالك هم
اكتر من الايام
الدنيا منتظرة صوتك
ليه رحت قوام
ضاقت مساحة الكلام
والشوك
ما زال يوعد بصحبة ورد
الشوك خسيس
عمره ما يوفى بعهد
الشوك- كما تعرف
خبيث ..خوان
وفجرنا اعمى
ساكت ما لهش ادان
وكل صبح جديد
بحزن قديم
فينك يا عبد الحليم
لا عاد حبيب ينضم
ولا عبير ينشم
ولا ضحكة ملو الفم
هربت ليه يا عم
مش كنت تنتظر الليالى الهم
ملونة فلسطين
بطعم الدم
والضحكة
اناتنا ..اذا تتلم
وكل مانشد الامل
ننشد
الكل راحل .. والجناح منحول
فى غربة تقتل قلبنا المقتول
رحل فى صوتك
احلى ما فى صوتى
ورحل بموتك
فرحتى بموتى
هاربة الحدود وبيطاردها الحد
الاغتصاب
ما لوش حدود ولا حد
كله بيرحل
من دموع الخد
للشهدا
نايمين ع الكتاف .. واليد
ابدان
بطول حزن الحياة ..تتمد
صوت البيوت الطيبة
بتتهد
صرخة وليد اخضر
صرخها بجد
الطيارات
الحراتات
الجرافات
تقتل تاريخ الارض
والحزن
خيط ضى الاسى الممتد
الحزن صاحب حميم
فينك يا عبد الحليم
فينا احنا يا عبد الحليم دلوقت
مين اللى قتل الثانى فينا
احنا والا الوقت
اتعسا فى الحياه
النوم وقلة الانتباه
الصمت والصوت
يبقوا شىء واحد
سكت والا نطقت
الكل فى البعد اتنسى صوته
وانا اللى للصوت القديم
اشتقت
فينك يا عبد الحليم
فات ايه
وامتى
وكام
هل لما غنينا الوطن
كنا بنفرش بيه على الرصفان
وناكل الساقطة من الاغصان
نتجاهل النكسة ورا النكسة
ونندغ التواريخ والاحزان
ويشتم الشاتم
نقول " احسنت
والامة تدخل دايرة التحريم
فينك يا عبد الحليم
انا هنا
اشبه غروب لشعر والاحلام
انا هنا
مطرح ما مديت ايد وقلت سلام
فارش فى ضلة حيرة الايام
انا ياللى كنت مليح
والخلق شردها عويل الريح
الدنيا تزحم فى طريق مسدود
تلف قدامى وخلفى عباد
وكانى مش موجود
وكان عمرى ما خش قلبى ناس
فى وشى تقرا ملامح الامة
الضلمة نور والنور جبال ضلمة
اهتف انادى بحق من غير صوت
اهتف انادى حق
شبعان موت
اتدلدلت فتايل القناديل
واتنجست سجادة المواويل
مهر الفساد
وسط الخلا مفلوت
وباقول يا ليل
ارواحنا متباعة بتمن الموت
كل الجرتح ما تئن
شوقى القديم بيحن
لحبر غير الحير
وشعر غير الشعر
وسن غير السن
ازاى هربت
من البلا الى يجن
وزمن ينسى اللى يئن..يئن
تعال شوف الدنيا
من غير حسن من غير ناس
وانا بنفس الؤم
نفس الطريقة القديمة
فى زحام البكم
بارخى لجامى
واخدع السياس
فينك يا عبد الحليم
مين اللى
هيحصد آهات الارض
ويبلغ الاحساس
انا اللى مسكون بالسكوت
لو موت ..ما نيش ملفوت
وانت
بتضحك جنب منى ..تفوت
الكدب مالى الكون
الكدب ما لوش لون
الكدب ..بلع الالسنة والصوت
مين اللى ردم اللون ده
فى الاحزان
مين اللى ردم الاهل
تحت الهد
مين اللى خان يونس
سؤال فى خان يونس
عليه
ما جاوبنى ابدا..حد
فينك يا عبد الحليم
الامة بتعانى وبتعانى
ما عادتش نفس الامة
نفس الخلق
والكدب
ما عادش زى ما كان ايامك
زما عادش نفس الحق هوة الحق
ارحل باحلامك
رحل زماننا يا صاحبى
قدامى وقدامك
وامتك
بكدبها اتباهت
الامة
فى دروب الاسى تاهت
الامة زى العادة بتعانى
لكن معاناه ..كدب ..برانى
مش زى ما كانت
آدى المسيح
شايل صليب تانى
اظنه غير دكهة
دهه..باهت
عن وصفه عاجزة كل احزانى
والعدرا
من يوم البكا بتبكى
ولدها مقتول
ع الصليب..متكى
الدمع مات
من كتر ما ناحت
كل النسا فى ارض وجيل
ليها ولاد ماتت
العدرا تبكيهم سوا..وتئن
تبكى
وتتدارى ف صليب الابن
يا ام المسيح
من قعدتك قومى
آدى الصهاينة بيمشوا فى دروبى
وقلعونى ..ومشيوابهدومى
والحزن
فى القلب القديم ..فاحت
وف كربلاء
آدى الشهيد..محمول
كل العراق
زى الحسين مقتول
والدنيا فاهمة
وانا اللى لسه غشيم
فينك يا عبد الحليم
اهو زى ما سبتنى
يوم الرحيل ونويت
وسمعت بالموتة وانا
باعبر طريق..ومشيت
ولا كانك مت
كملت خطوى وفت
ما حصلش غير
طراطيش اغانى وضحك
وهموم وطنية
تمر زى الطير
وصوت
ما عادش يدق باب البيت
وانا فى الحقيقة
مش باقول مشتاق
عشان مشتاق
كل الحكاية
فى زنقة الاوطان
وميلة الميزان
لما تخوى حدادى اللوعة
والغربان
كنت انت نافعنى
اذا قلت يا فلسطين او يا عراق
او اغنى احلامنا اللى ضاعوا هباء
وكل يوم اوطان
بيغيبوا فى الاجواء
يغيب عنا الصوت
وتفضل الاصداء
ويتملى الجورنان
بضحكة الاعداء
وقليلة ع الكلب
قولة لئيم
وانا فينك يا عبد الحليم
كتبت سطرين
بس كنت حزين
ادى ورقتى لمين
فينك
نغنى تانى موال النهار
يا صاحب الرحلة ف طريق الشوك
انت ما متش
هم شبعوا موت
المسالة مش صوت
المسالة
هم الجميع يتحضن
المسالة
تترجم المعاناة..وطن
المسالة امتنا فى التيه
تفتكر
وتنتفض
وتعود
تنفض غبار الياس
على رمل الحدود
نمر من باب الوجود
نعيش جنود ونموت حنود
نفضح ونهزم العدو
مازال يحاربنا بكل سلاح غشيم
نفضح ونهزم العدو
نفس العدو الندل القديم
كما فعلنا ف مصر
لاجل النصر
مش ده اللى خلاك فى الضمير
عبد الحليم
القلب الأخضراني
أنا كل ماأجول التوبة يا بـوي
وحشاني عيونه السوده يا بوي *******
متغـرب والليالـى يـا بـوي والرمش اللي مسهرني يا بوي أنا كل ما أجول التوبة يا بوي وحشاني عيونه السوده يا بوي ********
يا رموش قتاله وجارحه يا بوي أد يكى العمر بحاله يـا بـوي ********
أنا كل ما أجول التوبة يا بوي وحشاني عيونه السوده يا بوي ********
القلـب لأخضرانـى يابـوى ولا قادر طول غيبكم يا بـوي أنا كل ما أجول التوبة يا بوي وحشاني عيونه السوده يا بوي ********
أنا كـل مـا أجـول التوبـة